Palinaah India awm chhunzawm

India chu Asian Games 2023 neih laiah palina a ni mek, nimin tlai thleng kha chuan medal 56 an la thawh. Medal a lak zinga hian 13 chu gold niin, silver 21 leh bronze 22 a awm bawk.

Nimin khan hmeichhe TT player Sutirtha Mukherjee leh Ayhika Mukherjee te inkawp chuan doubles huangah bronze medal an la a, hmeichhe speed skating team Sanjana Bathula, Karthika Jagadeeswaran, Heeral Sadhu leh Aarathy Kasturi Raj te chu 3000m relay race huangah pathumna an ni bawk.

China khawpui pakhat Hangzhou-a inelna neih laiah hian Mizo nula Lalremsiami Hnar pawh a tel. Hmeichhe hockey inelnaah inlanin an pool match hmasa pathumah an chak vek a, tukin zing dar 7:45 hian Hong Kong nen an inkhel leh ang.

Hong Kong hian tun inelna neih laiah chak an la nei ve lo a, tun hmain India nen hian vawi khat chauh la inkhelin 2013 Women's Asia Cup khan India chu 13-0 in an lo chak tawh, tun ṭumah pawh hian rinkai zawk an ni.