Duhtak Napoli, ka hmangaih che - Osimhen

Serie A champion Napoli chuan tun hnai khan an striker chhuanvawr Victor Osimhen-a penalty hlah lai chu TikTok lamah an pholang a, an player penalty hlah chu fiamthu thawh nan an hmang - he thil thleng avang hian Napoli lamin sawiselna nasa tak an tawk a, Osimhen-a agent phei chuan dan anga hmalakah a vau hial.

Osimhen pawhin social media lama Napoli jersey haa a lanna zawng zawng a paih thla a, a bik takin a Nigerian puiten an la na a, Nigeria sports minister John Owan Enoh chuan he thil thlengah hian Italy sorkar a dawr tur thu a sawi chhuak hial.

Season hmasa lawka ropui taka Serie A nomawi chawipuitu, inelna hrang hranga goal 31 khungtu laka Napoli chet dan hi khawvelin a dem a, Osimhen hi 'na' an tihpui a ni - mahse, thuthar ber chu maw, Osimhen-a'n Napoli a hmangaih thu a sawi chhuak hi a ni!

Napoli-a a hlim loh hun chang a, Nigerian forward lakchhuah hun nghak rengtu European club lianten chanchin lawmawm lo an hria a, "Kumtluangin aw Napoli," tia Osimhen-a'n Italian club tana a hmangaihna thu a chham nawn chu a ni, an hriat chu.

Thutlukna fuh

Osimhen hian Napoli a chhuahsan tur thu a sawi dawn emaw an ti a, mahse, buaina chhuah hnua social media lama a thu tharlam chu Napoli a hmangaih thu a ni! Nigerian forward chuan, "Kum 2020-a Naples khawpui pan tura thutlukna ka siam kha ka tan chuan hun hlu tak a ni reng ang.

"Naples khaw mipuite hian kan chungah an ṭhatna leh hmangaihna an lantir nasa êm êm a, kan inkarah midang an tlakzep ka phal ngai dawn lo," a ti a, Italian club tan a rinawmna thu a tiam nawn.

Osimhen chuan sawi zawmin, "Naples mipuite thathona leh phurna chuan ka thinlung leh thlarau zawng zawng nena he club tana khel tur hian min hnuk kal a, he club ka hmangaihna hi sawi nghin rual a ni lo - inchhuang tak chungin he jersey hi ka ha ṭhin a ni," a ti.

Napoli fan-te tan hei lo liama thu hriat nuam zawk a awm dawn chuang em ni? Kum 24 mi striker hian tun season-ah pawh league match sarih khelin goal nga a khung leh der tawh a, Napoli tan tun dinhmunah ani aia player pawimawh zawk an awm rih lo.

Ram mipuite u!

Kum 2020-a pound maktaduai 70-a Napoli pantu striker chuan, "Neapolitans zingah ṭhian ṭha tak tak ka nei ṭeuh a, ka chhungkuaah anni chu lawm taka seng lutin ka ni tin nunah hian an tel ve tawh hial a ni.

"Nigerian mipui chauh ni lo, min thlawpa ka tana ṭawng chhuak leh ka thlavang min hauhsaktute zawng zawng chungah lawmthu ka sawi a, hawh u, inlungrualna, inzahtawnna leh inhriatthiam tawnna hi i chawi nung zel ang u.

"Kumtluangin aw Napoli," a ti a, football khawvel a barakhaih - Napoli fan-te erawh lawmin an zuang thung a, an tihsual avanga an player ṭha ber lungawi lo anga sawi awm chu a lungawi tih an hre ta.

Osimhen-a thuchhuah siam hi Napoli tan chuna, "A hun tak" tih loh rual a ni lo - Serie A lama 4-0 ngawta Lecce sawp hlim team hian zanin dar 12:30-ah Champions League match khel turin Real Madrid an mikhual dawn.

Boruak a ṭha

Osimhen-a'n Napoli a hmangaihna thu a sawi nawn a, league match sarih khelh tawhah vawi khat chiah la tlawmin, Serie A table-ah pathumna an ni bawk - an league match hnuhnung pahnihah goal riat an khung a, an lamah goal khat chiah a lut!

Chu mai a ni lo. Napoli hian Champions League-a an match hmasa zawkah SC Braga chu 2-1 in an hneh bawk a, zaninah huphurhna rilru nei miah loin Carlo Ancelotti enkawl Real Madrid an lo mikhual ang.

King Carlo hminglem an pek Italian coach hian May 2018 - December 2019 inkar kha Napoli hi a lo enkawl tawh a, a club hlui khelmualah a leng leh dawn tihna a ni a, mipuiin eng tiang takin nge an lo lawm dawn, sawi thiam a harsa.

Napoli hi season hmasa league champion nihpuitu Luciano Spalletti chuan a chhuahsan a, Rudi Garcia hoin season bul an ṭan - AS Roma boss hlui hoin season bul an ṭan chhe hran lo a, zaninah pawh hnehna chan an beisei ngam ang.

Hei le Real

Real Madrid-in tun season inelna hrang hrangah match kua khel tawhin, vawi riat an chak a, vawi khat chiah an la tlawm - an tlawm awmchhun hi Madrid derby-a Atletico Madrid an ngam loh chu a ni a, an insiamṭha leh rang hle.

Atletico an ngam loh hnua an league match hnih khelhah an chak ve ve a, goal nga khungin an lamah goal a lut miah lo! Inringtawk takin Real hian Napoli khelmual an lut dawn tihna a ni a, hetihlai hian defender pawimawh David Alaba hliam a la dam loh avangin Italy-ah hruai a ni lo.

Real tan chak tur chuan Jude Bellingham a pawimawh leh dawn a, Rodrygo leh Vinicius Junior an awm a, Joselu hi kum upa deuh tawh mah se a rintlak viau bawk - Luka Modric leh Toni Kroos an la nei tih hre bawk la!

Ancelotti tan chak a pawimawh lehzual - Italian coach hian 2018-19 Serie A-ah khan Napoli hi pahnihna a nihpui a, dressing room boruak ṭha lo leh president Aurelio De Laurentiis nena an inkar avangin Italian club a chhuahsan. Zaninah phuba lak a duh ang.