Cricket World Cup 2023 Ni hnih chiah a awm ta

India ramin cricket inelna sang ber Cricket World Cup a thleng dawn a, October 5, Ningani aṭangin khelh ṭan a ni dawn. Inelna thlengtu India chu champion tura rinkai zinga mi an ni a, Men in Blue hian kum 2011 hnuah nomawi an la chawi leh loh avangin nomawi chawi an tumruh hle.

World Cup ṭan ni hian kum 2019 final-a inhmachhawn England leh New Zealand te Ahmedabad-ah an inkhel dawn a, opening match khelhna tur Narendra Modi Stadium-ah hian mipui 132,000 an leng a, helai hmunah hian final khelh a ni bawk ang.

Team 10

World Cup-ah hian team 10 an tel dawn a, inelna thlengtu India bakah Afghanistan, Australia, Bangladesh, England, New Zealand, Pakistan leh South Africa te chu tling sa an ni. Qualifier hmangin hmun ruak pahnih hnawh khah a ni a; Sri Lanka leh Netherlands te an invaw tling leh bawk.

Group stage-ah hian team 10 te hi ṭhendarh an ni lo a, vawi khat ṭheuh an inkhel chhuak vek dawn. A sang paliin semifinal an khel dawn a, knockout stage lut chin chu an thiam thaw khat tih a chiang hle.

Stadium 10

India ram hi cricket ngainatna ram a ni a, World Cup thleng pha chin khawpui an vannei hle. NorthEast aṭangin World Cup thleng an awm lo a, a thleng awm ber Guwahati-in warm up match chauh an thleng.

World Cup khelhna turte chu Ahmedabad (Narendra Modi Stadium), Bangalore (M. Chinnaswamy Stadium), Chennai (M. A. Chidambaram Stadium), Delhi (Arun Jaitley Stadium), Dharamshala (HPCA Stadium), Hyderabad (Rajiv Gandhi International Cricket Stadium), Kolkata (Eden Gardens), Lucknow (BRSABV Ekana Cricket Stadium), Mumbai (Wankhede Stadium) leh Pune (Maharashtra Cricket Association Stadium) te an ni.

Entu mi 132,000 lenna Narendra Modi Stadium-in match nga a thlen tur zingah opening leh final match bakah India leh Pakistan inkhel a tel a, nuai khat chuang lenna ni mah se an khat vek dawn. Semifinal hi kum 2011-a India champion-na hmun Wankhede Stadium leh Mecca of Indian cricket an tih mai Eden Gardens-ah khelh a ni ang.