Lukaku hoin AS Roma an chak

Jose Mourinho enkawl AS Roma an che ṭha tawk lo a, sawisel an hlawhna karah result ṭha an nei ta. Romelu Lukaku leh Lorenzo Pellegrini te goal hmangin an mikhual Frosinone chu 2-0 in an hneh.

Season an ṭan chhiat avangin Mourinho an sawisel nasa a, Portuguese manager hian a mawhphurh a nih thu leh chhuah tumna a neih loh thu a sawi hnu an match hmasa berah result ṭha an nei ta a ni.

Chelsea duh loh bakah loan hmanga a chhuahna Inter Milan pawhin an lak ngheh tak loh Lukaku kha mamawh chhanna a la ni reng. Mourinho-a'n, "Amah hmangaihtu bulah a che ṭha mai ṭhin," a tih chu a takin a lantir mek.

Belgium international striker hian Roma tan Serie A match vawi nga aṭangin goal thum a khung tling leh ta a, tun season league match bikah a vawi hnih nan an chak. Lukaku chuan, "Kan tan chuan hnehna hlu tak a ni, a bik takin goal khung tura kan inzirna a hlawhtling kha a lawmawm," a ti.

Roma hian Ningani zanah Europa League an khel zui dawn - Mourinho chuan Servette an mikhual hunah a player ṭha zawng zawng khelhtir a tum lo, a bik takin Paulo Dybala a inlan dawn lo tih a sawi chiang nghal.

Mourinho chuan, "Ningani zanah a inkhel ve lo ang, a chhan chu tun hnaiah Paulo hi a inkhel tam êm êm a, hahchawlh a mamawh ve a ni. Amah leh team tana ṭha tur ka ngaihtuahin match ṭhenkhata a chawlh a ngai," a ti.

Pathianni zan Serie A inkhel dangah Juventus leh Atalanta te chu goal awm loin, 0-0 in an inhnehtawk. Team pahnihin goal khung theihna remchang nei mah se an khung thei lo ve ve a, point khatah an lungawi a ngai.

Juve manager Massimiliano Allegri chuan, "Atalanta khan min nawr buai hneh hle, tun hnai an match hnuhnung palia vawi thum chak thei an ni a, hmachhawn pawh an awlsam lo khawp mai. Kan tan chuan point hlawhchhuah theih kha a hlu.

"Tunah chuan Pathianni zana Torino nen Derby kan khelh tur atan rilru kan pe leh nghal ang, goal hmaah hriam lehzual zawka kan chet theih dan tur kan ngaihtuah a ngai," tiin a sawi.