Player 10-a khel Forest-in Brentford an chelh

Nottingham Forest-in October 1, Pathianni zan khan Brentford an mikhual a, 1-1 in an inhnehtawk. Forest defender Moussa Niakhate hnawhchhuah hnuah Christian Nørgaard hmangin Bees-in hma hruai mah se mualneitu hian Nicolas Domínguez hmangin siphurh an sut.

City Ground-ah team pahnih inkhel a nung ṭha a, Forest tan Anthony Elanga-a'n chance ṭha a hlah hnuah Bees tan Yoane Wissa-a'n a aia chance ṭha zawk a hlah. Second half-ah Moussa Niakhate-a'n Wissa a titlu a, thil thlen dan VAR hmanga ennawn a nih hnuah Forest defender Niakhate hi hnawhchhuah a ni.

Bees hian freekick hi hmang ṭangkaiin Mathias Jensen-a ball vawrhluh chu captain Christian Norgaard-a'n minute 58-naah a tauh lut. Mikhual team-in hma an hruai a, an tam zawk bawk. Mahse, minute 65-naah substitute Harry Toffolo cross chu Nicolas Dominguez-a'n Forest tan a tauh lut a, 1-1 in inkhel a tawp.

VAR hmangin Forest defender hnawhchhuah ni mah se VAR thutluknaah Bees coach Thomas Frank a lawm lo. Frank chuan, "VAR chungchang sawi hi ka ning tawh. Handball vawi hnih a awm a, manager ṭhenkhat chuan penalty an beisei ang. Kei chuan ka beisei lo, kan lakah pe se chuan ka thinur khawp ang. Chutihrualin Forest keeper-in Wissa a tihtluk erawh penalty ngei tur a ni," tiin a sawi.