Semifinal-ah Medvedev a lut

Mipa tennis world number 3 Daniil Medvedev chuan nimin khan China Open khelh laiah semifinal a lut. Beijing khawpuia inkhelah Russian tlangval hian Ugo Humbert chu 6-4, 3-6, 6-1 in a hneh.

Russian tlangval hian a duhthusama ṭhain a khel lo tih a sawi, set thum an khelh chhungin a service vawi li ngawt a hloh avangin a khelh ṭhat ni a ni lo tih a chiang a, chutihrualin a khingpui service vawi ruk a chhuhsak theih avangin a chak hram.

Quarterfinal inkhel dangah Alexander Zverev chuan Chilean player Nicolas Jarry chu 6-1, 6-7, 6-3 in a hneh ve bawk a, vawiin tlai lamah Medvedev leh German tlangval Zverev te hian final luh an inchuh zui leh dawn a ni.

Nizan khan seeded pakhatna Carlos Alcaraz leh Casper Ruud te an inkhel a, anni pahnih bakah hian Grigor Dimitrov leh Jannik Sinner te an intum bawk a, result erawh kan hre hman lo.

China Open-ah hian world number 1 Novak Djokovic chu a inlan lo. Serbian star hian US Open nomawi a chawi hnu lawkah an ram tan Davis Cup a khel zui a, chumi hnuah a hahchawl rih a ni.