Atletico Madrid an ‘comeback’

Pathianni zan La Liga inkhelah Atletico Madrid-in goal hnih ngawt an chhuah hmasa a, mikhual Cadiz-in minute 30 hmain goal hnih an khung hman - Lucas Pires leh Roger Martí ten mikhual tlangnel tan goal an khung a, 2-0 a ni.

Mahse, Atletico Madrid an beidawng duh lo - Angel Correa chuan minute 32-naah si phurh sut ṭhenin, second half ṭan aṭanga minute khatna lekah Nahuel Molina chuan si phurh a sut zo.

Atletico hian an duh tawk mai lo. Argentine forward Angel Correa chuan minute 66-naah khung belh lehin, 3-2 in a team hi hnehna a chanpui a, Valencia laka 3-0 a an mualpho hnua an league match thumah an chak vek - an hneh zingah 3-1 a Real Madrid an hneh chu a tel.

Diego Simeone-a enkawl team hian Nilaini zan dar 10:15-ah Champions League match an khel zui dawn a, Feyenoord an mikhual ang. Spanish club hian an match hmasa zawkah Lazio chu 1-1 in an inhnehtawkpui a, Nilaini zanah chuan chak ngei an duh tawh ang.

Pathianni zan inkhel dangah Almeria leh Granada chu 3-3 in an inhnehtawk a, Almeria tan Luis Suarez chuan hattrick a siam - Largie Ramazani siamsak vek a ni!