First Division boruak a ‘hot’

Aizawl DFA First Division inelna boruak a nung chho zel a, vawiin hian Lammualah match hnih khelh a ni leh dawn. Kanan FC-in tukin zing dar 8:00-ah point la hmu lo Tanhril FC an hmachhawn dawn a, coach Chawngthansanga kaihhruai KFC tan a chung bera awm Bethehem Vengthlang FC hnaihna remchang a ni thei ang.

Chawhma dar 10:00-ah Sihphir Venghlun FC leh Ramthar Veng FC te an inkhel zui ang. Sihphir Venghlun hian point kua an hmu tawh a, point khat paihsak ni lo se point 10 hmu tawh tur an ni zawk. Ramthar erawhin point ruk chauh an la hmu a, chutihrualin an khelh ṭhat phu tawk point an hmu lo. Ramthar Veng hian Sihphir Venghlun hi an hneh a nih chuan club pahnih hi an point kua ve ve an hmu dawn a, goal difference aia head to head en hmasak tur a nih avangin Sihphir Venghlun chungah Ramthar Veng an awm thei dawn tihna a ni.

First Division-ah hian team 10 an awm a, vawi khat inkhelh chhuaha a sang paliin semifinal an khel dawn. Table thlir chuan club pasarihin hmun ruak pali hi an inchuh mek a, result danglam tak tak a thlen avangin First Division inelna boruak a hot hle.