Chelsea an chak ve ta!

Tunah chuan Chelsea ṭantute pawhin 'Kan Chak' tiin status an update ve leh thei ta. August 26 hnua a vawi khat nan Premier League-ah an chak leh chiah a, an mikhualna ramah Fulham chu 2-0 in an hneh.

Thawhṭanni zan inkhelah Mykhailo Mudryk chuan Blues tana a goal hmasa ber a khung a, a hnu lawkah Armando Broja chuan a khung belh. Mauricio Pochettino naute hi EPL bikah tun season chhunga an chak vawi hnihna a ni.

Hnehna chu

Player tam tak an hralh a, tam tak an la lut thung - coach Pochettino pawh a thar a ni. Argentina manager hian 'Chelsea Thar' din a tum a, a tir lam kawng chu a awlsam rih lo hle, tluk leh din fawma kal pawh an ni lo, an tlu deuh ngar ngar a ni ber mai.

Mahse, theihna a nei miau a, tunah chuan lawm ni a her chhuak ve leh ta. Pound maktaduai 89 man Mykhailo Mudryk chuan minute 18-naah Levi Colwill-a ball cross chu a awmin a la thla a, laklawh nei miah loin a khung - London club tana a league goal hmasa ber a nih avangin a hlu.

Fulham an insiamṭha hman lo, goal hmasa luh aṭanga minute hnih pawh a liam hmain an chesual. An ball inpek sual dawngtu Cole Palmer chuan box chhungah Broja tan a lir lut a, ani hian kum 2022 October thla hnua a goal khung lehna hmasa ber turin a khung keuh.

Mualneitu Fulham lamin an bei let hleithei lo, second half-ah Sasa Lukic chuan hun remchang ṭha nei mah se yard ruk vel leka hnai aṭanga a pet chu Chelsea goalkeeper Robert Sanchez-a'n a lo dansak.

Blues tana duhthusam lo lai pakhat chu malpui hliam tenau vangin Mudryk thlak a ngai, amaherawhchu coach Pochettino chuan Inrinni zana Burnley nen an inkhelh hunah a winger hi chhawr theih a inbeisei thu a sawi.

Mudryk leh beiseina

Shakhtar Donetsk tana a khelh laiin Mykhailo Mudryk hi hmatawng hlauhawm tak a ni ṭhin, a tlan chakin a che rang a, goal a khung thei bawk. Arsenal nen indawr hnai hman viau mah se sum hmang hnem ngam zawk Chelsea-in an chang.

Stamford Bridge-ah beisei angin a khel chhuak thei mai lo. Poch-a chuan a player hi a boruak siam danglam a tum nasa hle, training an neih laiin 'crossbar challenge' te a neihpui, inrintawkna a neih theih nan kawng a dap nasa hle.

Chelsea tan match 24 a khelh tawhah a inringtawk lo tih a lang ṭhin. Mak tak maiin Fulham an hmachhawn meuh chuan a danglam ta, a thothang a ṭhain goal hmaah a chiai ta lo, an beisei Mudryk kha a inlar dawn ta pawh a ni mai thei.

Blues manager Pochettino chuan, "Inkhel tura Misha Mudryk ka thlan chhan chu training-na hmunah a tih ṭhat vang a ni a, a rilru a pein theihtawp a chhuah ṭhin a, tunah chuan a hun a lo thleng ta, a dang pawh kan beisei ang," a ti.

Chelsea first-team player 12 ngawt an inhliam a, hrem vangin striker Nicolas Jackson leh defender Malo Gusto te an chhawr thei lo bawk. Hun harsa an tawh laia point thum hmuh theih hi an tan a hlu a, an tan season boruak ṭha inṭanna a nih an beisei ang.