Aizawl FC an inbuatsaih ngawrh

Tun season I League chu October thla tawp lam hian khelh a ni dawn a, NorthEast aṭanga I League champion hmasa ber Aizawl FC pawhin result ṭha neih ngei tumin an inbuatsaih ngawrh hle. Mizo club hian Dutch coach Erol Akbay leh assistant coach B. Malsawmtluanga hoin RG Stadium-ah training an nei a ni.

Aizawl FC hian August thla tawp hian Delhi lama hmunpui nei Trajon India company nen inremna an ziak a, Delhi-a hmunpui nei Trajon hian main sponsor an nih angin club senso ṭhahnem tak an tum dawn.

Chutihrualin AFC leh Trajon inremna hian nghawng lian tak a nei a, player ṭhahnem tak an rawn ken tel avangin Mizo club squad a chhah hle. Tunah hian player 30 chuangin training an nei mek a, AFC tana I League khel pha turin player-te an ṭan a ngai hle.

MPL10-ah Aizawl FC hi squad nei chhah ber an ni a, an squad chhah sa hi player 10 chuangin an rawn belh leh avangin starting eleven chu sawi loh squad chan phak ringawt pawh a harsa ang.

A êng zawnga thlir chuan headh coach Akbay-a'n duh thlan tur player a ngah a, training mamawh hun lai taka MPL an chawlh bawk avangin I League atan duhthusam inpuahchahna a nei thei bawk. Aizawl FC hian tun hnaiah champion an beisei pha ṭhin lo a, a chanve chung lama awm pawh an harsat. Tun season-ah erawh training-na hun ṭha bakah player ṭha an kawl tam avangin result ṭha zawk a beisei theih ang.