Semifinal-ah India an lut

Lalremsiami Hmar telna Indian Women's Hockey Team chuan Asian Games 2023 neih laiah semifinal an lut. India hian nimin khan an pool match hnuhnung ber khelin Hong Kong chu 13-0 in an sawp.

India hi pool A-ah awmin, pool match vawi li an khelhah point 10 hmuin a chung berah an awm. Semifinal-ah chuan pool B lama pahnihna nen an inhmachhawn thei dawn a ni - Mizo nula Remsiami tan Asian Games medal a hnai ta hle.

Nimin zing Gongshu Canal Sports Park Stadium, Hangzhou-a inkhelah hian India tan striker tawnhriat ngah Vandana Katariya, Deepika leh vice captain Deep Grace Ekka ten hattrick an siam a, Sangita Kumari-i goal hnih bakah Monika leh Navneet Kaur ten an khung bawk.

Nmin tlai thleng khan India chuan Asian Games-ah hian a pumpuiah medal 62 a la tawh - India medal lak zingah hian 13 chu gold niin, silver 25 leh bronze 25 a awm bawk. A che ṭha ber China chuan gold medal 154 a la tling tawh a ni.