Newcastle hmachhawn tur Mbappe

Kylian Mabppe a dam ṭha a, a dam ṭhat thu hi Newcastle United lam tan chuan chanchin ṭha a ni kher lo ang. Zanin dar 12:30 hian Magpies chuan Champions League khel turin Paris club hi an lo mikhual dawn.

Eddie Howe-a naute hian an UCL match hmasa zawkah AC Milan chu goal awm loin an inhnehtawkpui a, an inkhelh banah Howe chuan thil tam tak an zirchhuah thu a sawi, an thil zir chu PSG lakah a taka lantir an tum ang.

PSG coach Luis Enrique-a'n team thar a din a, tun hma lama an la tih theih ngai loh UCL chawi an tum. Ligue 1 lama an result en chuan beisei san ngam an harsa, mahse, France captain Mbappe kawltu an nih avangin thil danglam thlen thei tur team an ni.

Mbappe hi Marseille an hneh ṭumin a inhliam a, a hnua Ligue 1 an khelh lehah inlan mah se goal an khung lo. UCL-ah erawh thapui an thawh dawn - Borussia Dortmund an luhchhuah result ang kha neih leh an tum ang.

Kieran Trippier leh a ṭhiante tan Mbappe hi ven ngun ngai bik tur a ni dawn, chutihrualin inelna hrang hranga an match hnuhnung pangaah goal an chhuah miah lo, an hmachhawn zingah Manchester City pawh an tel - PSG tan awlsam taka paltlang theih an ni ngawt dawn lo.

Group F inkhel dangah zanin dar 12:30 tho hian Bundesliga club Dortmund chuan Italian club ṭha AC Milan an lo mikhual ve thung dawn a ni.