A chunga awm tur zawnna : City vs Leipzig

Manchester City chuan zanin dar 12:30 hian Red Bull Arena-ah RB Leizpig an tlawh dawn a, tun season Champions League group match vawi hnihna chauh ni mah se group G-ah chuan pakhatna dinhmun luahtu tur zawnnaah a ngaih theih. Zanin hian point la hmu lo Red Star Belgrade leh Young Boys te an inkhel bawk ang.

Leipzig leh City hi season liam ta khan UCL last 16-ah an lo inhmachhawn tawh a, Red Bull Arena-a an inkhelh ṭum hi kumin February chauh kha a la ni. Khami ṭum khan Leizpig-in football khawvel barakhaihin Pep Guardiola enkawl City chu an mualah an chelh a, Erling Haaland-a'n goal a khung lo.

Mahse maw, kumin March thla khan second leg khelh a ni a, Etihad Stadium-a an intawn leh meuh chuan City-in an theihna tak tak an lantir tawh. Haaland ringawtin goal nga a khung a, Ilkay Gundogan leh Kevin de Bruyne ten goal khat ve ve an khung bawk.

An inkhelh tawhna thlir chuan City buk a rit nghal a, chutihrualin tun dinhmunah Pep-a hote hian treble champion ṭum an la pha lo deuh. Hei bakah hian Leipzig muala goal khungtu Riyad Mahrez a awm tawh lo a, KDB a inhliam bakah Gundogan a chhuah bawk avangin kumina an intawn ṭuma goal khungtu zingah Haaland chiah a awm ta.

Marco Rose hote hian City lakah hnehna chan an duh a nih chuan Haaland an chelh theih a ngai a, Julian Alvarez an ngaihthah a thiang lo bawk. Pep-a hote hian kar liam ta khan Wolves 2-1 in an hneh lo a, tun season-a an tlawm hmasak ber ṭum a ni.

Wolves-in an muala City an hneh thei hi Leipzig tan infuihna ṭha tak a ni dawn. German club hian nipui bazarah an player pawimawh Christopher Nkunku (Chelsea), Konrad Laimer (Bayern Munich), Dominik Szoboszlai (Liverpool), Joško Gvardiol (Man City) leh Alexander Sorloth (Villarreal) te an chân a; chutihrualin player thar lak nan euro maktaduai 150 vel daih an seng.

Player thar Loïs Openda leh Benjamin Sesko te goal khung kawngah an ṭangkai nghal a, player neih sa Dani Olmo a ṭangkai viau bawk. Chutihrualin PSG aṭanga loan hmanga an hawh Xavi Simons-a'n club thar tan bul a ṭan ṭha hle. City chu team ṭha zawk an ni ngei a, mah se Leipzig hi awlsam taka chakna tur a ni lo. Leizpig hian an match hnuhnung berah Bayern Munich hmachhawnin point khat an hlawh chhuak a, Bavarians hi a suttu zawk an ni tih hriat a ṭha.