A hun a thleng dawn ta - II
Cricket World Cup boruak kan luhchilh hmain, tualchhung cricket lam inthlir hmasa teh ang. Cricket Association of Mizoram-a hun rei tak honarary secretary chelhtu Mamon Majumder chu BCCI Apex Council lamah a awm a, dan tharah post pahnih chelh kawp theih a nih si loh avangin a hmun ruak thlanna hi neih a ni. Honorary secretary dinhmun pawimawh tak chelh tur hian P Lalremruata (Makuka), Chaltlang chu thlan a ni.
Hruaitu hmasa Mamon-a te thawhhlawkzia hre reng chung siin, Mizoram Cricket mutthlu leh mutan nei deuh anga lang ṭan tawh chu, oxygen thar dawng ang maiin bung thar erawh a kai leh dawn tih a chiang. Makuka hi player kan nih ve laia kan senior, professional kan khelh hnuah pawh kan manager a ṭang fo ṭhin a ni.
Mimal taka ka mi hriat chian a ni a, a hminga team-a senior player/kaptan dinhmun ka lo chelh ve lai pawhin hun awlah chuan hotel pindanah cricket leh a hmasawnna tur kan vei avangin vawi tam tak kan sawi ho tawh ṭhin. Kan duhthusam kan sawiho tlan ṭhin laite ka mitthla let a, tunah chuan a hma thlir tihlawhtling turin hna pawimawh a chelh ta. General Secretary hi sports association reng rengah chuan a khawl pui ber (engine) a nihna chen a awm a, Pu Makuka pawh a nihna pawimawhzia hre reng chungin Mizoram cricket hmasawn zawnga min zuanpui turin duhsakna sang ber ka hlan e.
World Cup Lamtluang
World Cup hian ni 46 chhungin India ram khawpui 10-a kan cricket stadium neih ṭhat ber berte hmangin match 48 min hlui dawn. India nipui tawp lam, favang bul inṭan lai, mah se keini Zotlang ram nuam a khawsa te tana, a lum lampang la ni tur a ni dawn.
Chutihrual chuan kan thailan tawh angin tlai thim hlim lama dai tlâk tam duh hun lai tak a ni thung. Hei hian nghawng lian tak a nei dawn. Infiamna khawvela discipline hrang hrang zingah hian, cricket anga a chhehvel inkhel boruak - ball, hmanrua leh khelmual phaitual hnim baka element dang leh a behbawm pawimawh tamna hi infiamna dangah hian a awm ve ang em aw, ka ti ṭhin.
Khelmual
Stadium hlun pali, mahse khelmual zau ber ni lem lo M. Chinnaswamy Stadium (Bangalore), Arun Jaitley Cricket Stadium (Delhi), Wankhede Stadium (Mumbai) leh Chepauk Stadium (Chennai) te hi an pitch-a lei sen (red soil) hmang an ni.
Spinner te an che ṭhat duhna hmun a nih rualin, batsman-te record siamna khelmual an ni fo bawk. Lei sen pitch hian a bik takin dai tlâk danin nasa takin kawng ro a su bik a ni. Ekana Cricket Stadium (Lucknow), Eden Gardens (Kolkata), Maharashtra Cricket Association Stadium (Pune), HPCA Stadium (Dharamshala), Rajiv Gandhi International Cricket Stadium (Hyderabad) te hi lei dum (black soil) hmang an ni thung.
Red soil pitch aiin ball a sawt ṭha a, batsman-ten nuam an tihna hmun a ni tlangpui. Dharamshala erawh, a hmun a san avang leh boruak a vawh avangin swing bowler-te an lo chet ṭhat ṭhinna hmun a ni. Tuna India rama kan khelmual chhuan tawlawl, mipui nuai khat chuang len theihna leh khelmual zau ber Narendra Modi Stadium, Ahmedabad hian pitch 11 neiin, panga hi black soil a ni a, a bak paruk hi black, red, yellow leh local black soil inchawhpawlh hmanga an siam a ni. Batsman bawkin nuam an ti ṭhin. Mohali leh Trivandrum te tun World Cup an thleng ve lo tur erawh cricket tui mite lunglawm a kim zan lo.
Tlai daifim
India ram favang leh thlasik bul inṭan chhoh hunlai Khuangchawi leh Sahmulphah thla hi zantir lama dai tlâk tam duh hunlai a ni a. Chumi lo chhan let nan chuan ICC lamin Dew Spray chu ground tin curator te hmang turin thu a chhuah tawh.
Dew spray hian dai lo tla, khelmual phaitual hnima bet ṭhin chu lei (a zung awma) lamah rang takin a luanthlak tir ṭhin. Tin, ball a lo huh a, bowler te engmah lova chantir ta mai ṭhin dai chu do zawh rual a nih loh pawhin, pitch tina hnimte chu tan kawlh vek lova, hring mawi tawk hnutchhiah a, fast bowler-te tana innghahna awm turin thu a chhuah bawk a nih kha.
Mi thar leh hranghlui
Khawvel a vir zel a, hun te a inher a, hmana ṭhangthar te kha Val Upa dinhmunah an lo ding. Chutiang bawkin tun World Cup hi Shubman Gill, Cameron Green te tan puitling, team innghahna tlâk kan ni tawh e, tih an pholanna hun ṭha a ni.
Chutihrualin Rohit Sharma, David Warner, Shakib Al Hasan, Ben Stokes te tan, "Kan cricket zinkawng hmawr bawk nan, nomawi ngei i hawn ang aw!" tia vawi khat lehna reng reng, thih tha nena an inlanna hnuhnung a nih tawh hmel e.
World Cup Chibai le