Barca-in rawlthar Yamal an thlung nghet

Spanish champion Barcelona chuan an rawlthar ngaihven hlawh Lamine Yamal chu contract thar an ziahpui a, La Masia chhuak rawlthar duhawm hian kum 2026 thleng Barcelona-a khelh chhunzawm turin contract hi a ziak.

Kum 16 mi lek Yamal-a contract-ah hian Barcelona chuan lei chhuah theihna dan an ziak tel a, mahse, Spanish winger hi lei duh an awm a nih chuan euro tluklehdingawn khat sen an inhuam a ngai thung ang.

Yamal hian kum a la tlin loh avangin a rei berah kum thum bak contract hi a ziak thei lo a, Barca hian a theih chin kum thum atan contract hi an ziahpui. Mahse, Spanish media-te chuan Catalan club hian Yamal hi kum a tlin hunah pawh an hnena khel zel turin inremna an neihpui sa niin an sawi a, tuna a contract hi a zawh hunah kum 2030 thleng khel turin contract a ziak dawn niin an sawi.

Lamine Yamal chuan, "Zinkawng thui tak a ni a, contract thar ka ziak thei hi ka lawm hle. Barca tana kum thum dang ka khel thei tur hi duhthusam thleng dik a ni a, Barca-ah hian hun duhawm tak ka tawn zel ka beisei.

"Ka kum ang zat leka Barca luhchilhte ka thlir a, tun dinhmun thleng hi kan zavaia beisei a nih avangin ka tan chuan hei hi chawimawina a ni. Tunah chuan Barca tana a tam thei ang ber nomawi chawi ka tum dawn a, a pawimawh ber chu hnehna chan zel a ni," a ti.

Spanish rawlthar hian Barca-ah kum khatah euro maktaduai thum a hlawh dawn niin an sawi a, kum 18 a tlin hunah a hlawh hi tam tham takin a pung leh ang. Yamal-a agent hi Jorge Mendes niin, Barca sporting director Deco-a ṭhian hnai tak a ni a, Yamal thlung nghet turin Barca midfielder hlui Deco hian tha a thawhhlawk hle nia sawi a ni.

Tun season-a Barca tan match kua khela assist vawi hnih nei tawh Yamal hian April 29, 2023 khan kum 15, thla kua leh ni 16 mi niin Real Betis lakah a league match hmasa ber chu a khel a, a hawi kir leh tawh lo.

Spain senior team tan pawh inlan der tawhin, match hnih a khelhsak tawh a, goal khat a khung - a goal khung hi Euro 2024 qualifier-a Georgia (7-1) an hnehna inkhelah a ni a, kum 16 leh ni 57 mi niin, Spain tana inlan thei naupang ber leh goal khung thei naupang ber record a siam.

Barcelona hian zanin dar 12:30-ah Champions League match khel turin FC Porto an lenchilh dawn a, an match hmasa zawkah Royal Antwerp chu 5-0 in an lo sawp tawh. He inkhelah pawh hian Lamine Yamal hi bench aṭangin a lut a ni.