Odisha tan Jerry goal a tawk lo

Indian Super League club Odisha FC tan Jerry Lalrinzuala chuan AFC Cup-ah goal khung mah se, a team chakpui nan a tawk zo lo a, group stage match-ah Bangladesh club ṭha Bashundhara Kings chu 3-2 in an ngam lo - match hnih an khelh tawhah an la tlawm ve ve!

Odisha tan Diego Maurício chuan minute 19-naah goal hmahruai khung mah se, mualneitu Bashundhara-in goal thumin an chhanglet - Brazilian forward Dori chuan goal hnih a khung a, a hnampui Miguel Figueira chuan goal khat a thawh ve bawk.

ISL club Odisha-in si thum an phurh hnuah, bench aṭanga luhtir Jerry Lalrinzuala chuan si phurh a rawn sut ṭhen a, mahse, Mizo fullback-in goal a khung hnuah goal dang a luh loh avangin Indian club an tlawm.

Odisha tan Jerry Mawihmingthanga leh Laldinliana Renthlei ten inkhel bul an ṭan a, K. Lalṭhathanga (Puitea), Jerry Lalrinzuala leh Isak Vanlalruatfela te chu bench aṭanga luhtir an ni.

Bangladesh club Bashundara hi Mumbai City assistant coach hlui Oscar Bruzon enkawl an ni a, Spanish boss hian season thum zet chu a zawnin Bangladesh Premier League-ah nomawi a chawipui tawh.

Group D inkhel dangah Indian club tho Mohun Bagan an chak thung a, an mikhual Maziya SC chu 2-1 in an hneh. Bagan tan Jason Cummings chuan goal hnih a khung a, goal hmahruai a khung bakah, hun pek belh minute hnihnaah chakna goal a khung.

Scotland-a piang, Australia international Cummings hian season hmasa lawk khan A League-ah Central Coast Mariners tan match 28 khelin goal 20 a khung a, tun season-ah Bagan a pan. Kolkata club tan hian inelna hrang hrangah match 10 khelin goal sarih a khung der tawh!

Maldives club ṭha Maziya tan Tomoki Wada chuan Cummings goal khung inkarah goal khat a khung ve a, mahse, Japanese attacking midfielder goal khung hian awmzia a nei phak ta lo a ni.

Bagan hian an match hmasa zawkah Odisha chu khualmualah 4-0 in an lo sawp tawh a, an group aṭanga hmahruaitu chauhin knockout round an luh dawn avangin AFC Cup-ah an ti mai mai lo - Odisha tan erawh kawng a thui ta hret.