Goal khung bansan thei lo Ronaldo

Cristiano Ronaldo chuan AFC Champions League-a a goal hmasa ber a khung a, FC Istiklol lakah Al Nassr chu 3-1 in a chakpui - a kalna apiangah Portuguese forward hian goal a khung belh zel.

Ronaldo hian UEFA Champions League match 183-a goal 140 khungin ani aia khung hnem an awm lo a, a record hi khum mai a nih pawh a rinawm lo - amah hnaih bertu Lionel Messi (129 goals) chuan USA lamah hun a hmang tawh. Ronaldo-a'n AFC lamah a khung leh ta.

Tajik club FC Istiklol hian Ivorian forward Senin Sebai hmangin goal hmahruai an khung a, mahse, 'star' player rual nena thawk chhuak Al Nassr-in tlawm an tum lo.

Ronaldo chuan minute 66-naah si phurh sutna goal a khung a, Talisca chuan goal hnih a khung zui ve bawk - mikhual Istiklol-in goal dang an khung thei tawh lo a, kut ruakin Saudi an hawsan.

Ronaldo a vul

Asian Champions League-ah club tinte chu ram pawn player paruk bak an neih an phal lo a, an zinga pakhat chu Asian player an nih a ṭul bawk - hei vang hian coach Luis Castro chuan Sadio Mane, Otavio leh Alex Telles te chu squad-ah a dah lo.

Heti chung hian Aymeric Laporte, Marcelo Brozovic, Talisca, Seko Fofana leh Ronaldo te Al Nassr-in an la tlar thei tho a, an elpui FC Istiklol tan chuan Saudi club hi an ṭha lutuk hret.

Ronaldo-a'n goal a khung leh ta a, Portuguese forward hian tun season inelna hrang hrangah match 16 khelin goal 17 a khung leh der tawh a, Saudi club lamah pawh Ronaldo-a'n goal khung a ṭhulh thei lo.

Al Nassr hi group E-ah awmin, an match hmasa zawkah Persepolis chu 2-0 in an lo hneh tawh a, match hnih khelh aṭangin point ruk an nei - an group-a an la tawn loh awmchhun hi Qatar club Al Duhail SC an ni a, anni hi Brazilian midfielder Philippe Coutinho neitu an ni.

Thil thleng dang

Nizan khan Lallianzuala Chhangte khelhna Mumbai City chu Asian Champions League-ah an inlan bawk a, he thu buatsaih a nih lai hian an result kan hre hman lo.

Hetihlai hian thil thleng danglam pakhat a awm bawk a, Saudi club Al Ittihad chuan Iranian club Sepahan nen an inkhelh tur chu an khel duh lo a, stadium luh kaa Iranian military commander Qasem Soleimani lim awm chu an ngai thei lo a ni.

January 2020-a US sipaiten an thah tak Soleimani hi Saudi sorkar chuan kum 2018 khan firfiakah a lo puang tawh a, hei hi Saudi sorkar hmalakna leh thil dang dang tihbuaina kawnga a inhnamhnawih vang a ni.

Saudi club hian an hmelma lim lo chuang vung an hmuhin inkhelh loh an thlang ta zawk a, Naghsh-e Jahn Stadium-a inkhel en tum fans 60,000 bawrte chuan ui takin inkhel an en thei ta lo - Al Ittihad hian Karim Benzema, N'Golo Kante leh Fabinho te ho chu an player neih zingah an tel.

Saudi vs Iran

Asian Football Confederation (AFC) chuan Champions League match ṭhulh a nih thu hi an puang a, a ngaihtuah tur bika ruat committee-in thil kalpui zel dan tur chu an rel tur thu an sawi.

Islamic Revolutionary Guard Corps hnuaia mi Basij te chuan kum 2016 khan Tehran-a Saudi embassy an bei a, he thil thleng avang hian ram pahnih inkar boruak a chhe hle - hemi hnu hian Saudi Arabia team-te chuan international sports competition hmachhawn tura Saudi kal an duh tawh lo.

Mahse, tun season aṭangin Saudi infiammiten Iran an lut ve leh ṭan a, Ronaldo khelhna Al Nassr chuan thla hmasa khan Iranian club Persepolis chu Iran-ah ngei an lo hmachhawn tawh. Mahse, Persepolis hi hrem lai an nih avangin inkhel entu an awm lo thung.

Ram pahnih inkar buainain zia lam pan chho zelin, Thawhṭanni zanah pawh Al Ittihad leh Sepahan te hi pangngai taka inkhel mai tura ngaih an ni a, mahse, beisei loh dan takin thil a thleng leh ta a ni.