Liverpool-in VAR official inbiakna an duh!
Kartawp Premier League inkhel ngaihven hlawhah Liverpool-in Tottenham Hotspur chu 2-1 in an hneh lo a, red card pahnih an hmuh bakah Luis Diaz goal khung chu pawmsak an ni lo bawk.
Inkhelh zawh rualin Professional Game Match Officials Limited (PGMOL) lamin ngaihdam an dil nghal a, Diaz goal khung chu pawm tur a nih thu an sawi - mahse, Reds-in point an hmuh phah tawh chuang lo a, an lawm thei lo.
Thuthar berah chuan Liverpool hian kha thil thlenga match official-te inbiakna record chu PGMOL hnenah an dil a, he thu buatsaih a nih lai hian an dilna hi tihhlawhtlin a nih dawn leh dawn loh hriat a la ni lo - khawthlang media ṭhenkhat chuan Liverpool dilna hi PGMOL chuan an remtihsak dawn niin an sawi.
Liverpool hian Pathianni zan khan thil thleng chungchangah thuchhuah lo siam tawhin, "PGMOL-in an thiam lohna an pawm tih kan hria a, kha inkhelah khan a nih tur ang takin football dan chu hman a ni lo tih a chiangin, infiamna zahawmna chu sawi nghinin a awm a ni.
"Match official-te hian boruak sang tak hnuaiah inkhel an enkawl ṭhin tih chu kan hrethiam. Mahse, video assistant referee kan hman chhan hi heng pressure-te la kiang a, dik zawka thil tih a nih theih nan a ni a, tihsual belhchhah nana tih a ni lo," an ti!
Liverpool chuan sawi zawmin, "Thutlukna dik zawk siam tura hun hman a ni lo kha pawi kan ti a, a tidik tura engmah tih a ni lo kha a pawi a ni. 'Mihring tihsual liau liau a ni' tia sawi a ni lehzel te kha pai dam a harsa a, khatiang thil thleng chungchang kan sawi dawn a nih chuan uluk taka zirchiangin, a langtlang thei ang berin kan ti tur a ni ang.
"Heng zawng zawng hi nakin hun lo awm zel tur atana thil pawimawh tak a nih avanga sawi kan ni a, nakin zela a thlen tawh loh kan duh a ni. Chutihrual chuan, thil ṭha zawk a chhuah theih nan ngaihtuahna kan seng zel ang," an ti a, tunah chuan an beisei angin official-te inbiakna audio pawh an dawng dawn niin a lang.
Liverpool leh Spurs inkhelh ṭuma chesual video assistant referee Darren England chu Pathianni zan khan Nottingham Forest leh Brentford inkhela fourth official tur ni mah se chawlhtir a ni a, VAR assistant Dan Cook pawh Thawhṭanni zana Fulham leh Chelsea inkhelah assistant referee tur ni mah se chawlhtir rih a ni bawk.