AFC U18 tan Judgement Day

I League Under 18-ah Aizawl FC Under 18 te fiahin an awm dawn. Mizoram club hian chawhma dar 10:45 hian East Bengal Club Ground, Kolkata-ah Sal-ga-ocar an hmachhawn ang.

Aizawl FC hian Group B hmahruaitu Salgaocar an hneh a nih chuan semifinal lut turin dinhmun ṭha takah an ding ang a, result dang a awm a nih chuan Aizawl FC hian group stage an paltlang a rinawm loh.

Aizawl FC-in Goan club hmachhawn tur-in inhliam vangin Van-lal-duatsanga an chhawr thei dawn lo a, winger tlan chak Lalmuanzoa dinhmun a chiang lo bawk. Hrem vangin MPL4-a senior team tana inlan defender Jonathan Lalhriatkima a inlan thei dawn lo a, ani aiah hian Hlimen rawlthar SR Lallawmawma hman theih a ni ang.

Salgaocar-in vawi hnih chiah an la khel a, East Bengal (2-1) leh Pune FC (1-0) an hneh. Goan club dinhmun a ṭha a, chutihrualin an chakna zat kan thlir chuan goal khat chauh a ni. Kolkata-a inkhel hi final round a ni tawh a, India ram hmun hrang hrang aṭanga team ṭha 10 thlan chhuah an nih tawh avangin match tin hi chetsual theihna a ni.

Aizawl FC assistant coach H. Lalnunzira chuan, "Ground awm dan kan hrethiam ṭan a, kan chak theih ngei ka ring," tiin Vanglaini palai hnenah beiseina sang tak an neih thu a sawi.