Thlasik transfer Transfer titi a ngaihnawm

Tukin zing dar 03:30 - 04:30 inkar khan England, Spain, Italy leh France football-ah January transfer bazar khar a ni a, Germany-ah erawh zanin dar 10:30-ah khar a ni ve chauh ang.

Ṭum dang ang bawkin British foot--ball bazar-ah sum chevel a tam a, nipui transfer-a an sum sen te nena belh-khawmin pound tluklehdingawn khat an hmang tling ngei dawna ngaih a ni. Heti zat sum hi an hmang tling a nih chuan season khata transfer sum chevel tam ber ṭum a ni ang.

Nizan thleng khan player lut leh chhuak tur chiang lo tam tak a la awm a, he thuziak i chhiar meuh hi chuan player lut leh chhuak chiang lo nia kan tarlante hi an dinhmun a chiang tawh ang.

Saido Berahino (West Bromwich Albion)

Kum 22-a upa striker hi Newcastle United chuan pound maktaduai 21-a lakluh tumin an dawr tawh a, nipui transfer-a lakluh tumtu Tottenham Hotspur chuan an dawr bawk niin an sawi.

English striker hian season hmasa khan league-ah goal 14 a khung a, tun season-ah match 20 khelin goal ruk a khung. Magpies leh Spurs-in an inchuh avangin a man hi pound maktaduai 25 thleng chho thei tura ngaih a ni.

Alex Teixeira (Shakhtar Donetsk)

Kum 26-a upa Brazilian midfielder hi Liverpool chuan pound maktaduai 27-a lakluh tumin an dawr tawh a, Shakhtar lamin pound maktaduai 38 an phut thung.

Chelsea nen pawha an sawi zawm midfielder hian Anfield pan a duh thu a sawi tawh a, Liverpool chief executive Ian Ayre chu Ukrainian club-in thlasik training an neihna hmun Florida-ah tun season league match 15 a inlana goal 22 khungtu midfielder hi lakluh tumin a kal.

Loic Remy (Chelsea)

French striker Remy hian Chelsea-ah khelhna hmun a chan tam loh avangin chhuah a duh nia sawi a ni a, amah duhtu zingah Leicester City leh Newcastle United sawi rik a ni.

Kum 29-a upa striker hian Premier League-ah goal khung a harsat lo tih a tarlang tawh a, a man zat hi pound maktaduai 11.5 vel thleng a kai thei ang.

Oumar Niasse (Lokomotiv Moscow)

Senegalese striker hi Everton chuan pound maktaduai 13.5-in an dawr. Kum 25-a upa striker hian tun season-ah match 21 khel tawhin goal 12 a khung a, Merseyside club tan tlarhma ti chaktu ni turin a ṭha tawk.

Mathieu Debuchy (Arsenal)

Kum 30-a upa defender hian Arsenal-ah hmun a chang tam tawk lo a, tun season-ah Premier League match hnih chiah a la inlan.

Kum 2014-a pound maktaduai 10-a Newcastle pantu hi Aston Villa leh Sunderland-in an duh a, London club hian loan-a an chhuahtir rin a ni.

Andriy Yarmolenko (Dynamo Kiev)

Dynamo Kiev-in Champions League last-16 an luh theihna tura goal thum khungtu striker hi Everton, Arsenal leh Stoke City-te an rim a, a man zat hi pound maktaduai 25 thlenga kai thei tura ngaih a ni.

Danny Rose (Tottenham Hotspur)

Kum 25-a upa English defender hi Manchester United nen sawizawm an ni a, Louis Van Gaal-a'n inhliam Marco Rojo leh Luke Shaw-te thlak turin a duh.

Pound maktaduai 6 man vel ni tura beisei defender hi Spurs manager Mauricio Pochettino-a'n chhawr rim lo mah se chhuahtir erawh a phal lo niin an sawi.

Player dang

Swansea City striker Bafetimbi Gomis chu Newcastle United nen sawi-zawm an ni a, French striker hi pound maktaduai 7 man vel ni tura ngaih a ni. Crystal Palace striker Dwight Gayle chu Swansea nen sawizawm an nih bawk avangin Gomis hi a chhuak a nih pawn a mak lo ang.

Real Madrid coach Zinedine Zidane chuan tun season La Liga-a match hnih chiah la inlan winger Denis Cheryshev chu club thar zawn phalsak a nih thu a sawi a, Russian winger hi pound maktaduai 7 man bawr vel a ni.

Paris Saint-Germain manager Laurent Blanc chuan chhuak tur anga sawi Ezequiel Lavezzi chu an chhuahtir loh tur thu a sawi ve thung a, Argentina international hi nipuiah a contract a tawp tawh dawn a, French club hian January-ah man neia chhuahtir an tum niin sawi mah se Blanc-a ṭawngkam aṭang chuan a chhuah loh hmel hle.