Ronaldo hattrick hmangin Real chak chiang

Pathianni zan La Liga in-khelah Cristiano Ronaldo-a ropuina belhchhahin a awm a, Portuguese forward hian 6-0 a Espanyol an sawpna inkhelah hattrick a siam.

Khelmuala minute 16 hun an hman meuh chuan Real Madrid-in goal thum an khung der tawh a, Karim Benzema-a'n goal hmahruai a tauh luh hnuah Ronaldo chuan penalty aṭangin a pet goal ve leh a, minute li hnu lekah James Rodriguez-a'n a pet goal ve leh bawk.

Chawlhlawk hmain Ronal-do-a'n goal khat dang a khung leh a, minute 82-naah a hattrick siamna goal a khung bawk. Real goal rukna erawh Espanyol defender Oscar Duarte-a'n an lama a tih luh a ni thung.

Real an ropui

Kar hmasa lawkah Real Madrid-in result duhawm lo an nei a, khualmualah Real Betis chu goal khat ve ve khungin an inhnehtawkpui.

Santiago Bernabeu-ah erawh Real-in mualneitu an ni tih an pholang a, inkhel
ṭan tir phat aṭangin kil tinah an chungnunna an pholang.

Gareth Bale inhliam vangin Rodriguez kan hmu a, Real tlarhma pathum Benzema, Rodriguez leh Ronaldo-te'n Espanyol tlarhnung an sawisa hneh hle.

Zinedine Zidane-a enkawl-na hnuaiah Real-in league match pali an khel tawh a, goal 17 an khung tawh a, goal hnih chiah an la chhuah thung.

Bul ṭanna duhawm lo

Espanyol tan Watford aṭanga an lak thar goalkeeper Giedrius Arlauskis-a'n goal a veng a, a club thar tana a match hmasa berah goal ruk a chhuah nghal.

Lithuania international hian Ronaldo freekick goal ngei tura lang chu ṭha takin a dang a, Real goal thum hmasaah dem theih a ni lo bawk.

Arlauskis chet chhiatna erawh a club thar defender-te nen an la inman tawk lo niin a lang a, Real tlarhmate an tlangnel chhan pakhat niin a lang.

Zidane-a thukhawchang

Real Madrid coach Zine-dine Zidane chuan a player chhuanvawr Ronaldo fakin, "Cristiano-a'n goal a khung hi chu ngaia neih tawp chi a ni tawh. Goal thum a khung lo a nih chuan mi tam tak ngaihah chuan khel ṭha lo a ni hial zawk tawh a ni. Hma a sawn leh chuanna tur hi hriatthiam a har tawh hle a, mahse rim taka thawh hi nuam a tih em avangin tun ai hian a la ṭha lehzual thei ang," tiin a player chu a fak hle.