Neville-a enkawl Valencia an chak thei lo

Manchester United defender hlui Gary Neville-a'n Valencia a enkawl hnuah league match-ah chak hmel a hmu hleithei lo a, Pathianni zan khan tla thei dinhmuna ding mek Sporting Gijon lakah 1-0 in an tlawm.

Neville-a'n December thla aṭanga Valencia a enkawl hnuah league match riat a hmachhawn tawh a, chak hmel a la hmuhpui lo. Inkhelh zawhah Valencia fan-te chuan an player-te an au el hial a, tun hnai an result ngaihtuahin a awm lo hran lo.

Valencia hian November 8-a Celta Vigo 5-1 a an sawp hnuah league match 11 khel leh tawhin chak hmel an la hmu lo a, vawi hnih an chak lo leh a nih chuan an club record chak lo rei ber chu an nih rual dawn a ni.

Mestalla Stadium-a inkhelah hian Barcelona B striker hlui Sanabria chuan mikhual team tana goal awmchhun hi penalty aṭangin a khung a, Valencia-in an sut thei lo.

Mualneitu team tan Man-ches-ter City striker hlui Alvaro Negredo chuan goal khung theihna hun ṭha a neih chu vawi thum lai a khawhral a, vawi khat phei chu post a pet per a ni.

Valencia hian Nilaini zana Copa del Rey semifinal first leg khel turin Barcelona chu Nou Camp-ah an luhkhung dawn a, Catalan club laka result ṭha hlawh chhuak turin an insiamṭhat a ṭul ang.