Serie A San Siro-ah AC Milan an au ring zawk

Pathianni zan khan San Siro-ah AC Milan leh Inter Milan te'n Serie A match an khel a, Milan Derby-ah table-a dinhmun chhe zawk AC Milan 3-0 in an chak.

Khawvel huap pawha derby ngaihhlutah hian Milan tan centre-back Alex-a'n first half-ah goal hmahruai a khung a, second half-ah Carlos Bacca leh M'Baye Niang te chuan goal khat ve ve an khung leh bawk.

Inter Milan hi kar laihawl khan Coppa Italia-ah Juventus lakah 3-0 in an lo tlawm tawh bawk a, a zawnin match hnihah goal thum an chhuah a ni.

He inkhel result avang hian Milan chuan point 36 hmuin table-ah parukna dinhmun an luah a, season thara Champions League khelh an beiseina an chhem nung zel. Inter erawh point 41 hmuin palina dinhmun aṭangin hma an sawn lo a, champion an beiseina a thamral mek.

Milan goalkeeper Gianluigi Donna-rumma-a'n Inter striker Eder a tihtluk chu referee Antonio Damato-a'n penalty a pek loh vanga lungawi lo Roberto Mancini chu fourth official laka a chet mawi loh vangin hnawhchhuah a ni.

Italian manager Mancini chuan, "Milan ka lawmpui a, mahse result fair tak chu a ni lo. Refree-in inkhel a enkawl dan khan min ti chhe vek a ni," tiin a lungawi lo hle.

AC Milan president Silvio Ber-lus-coni chuan an manager Sinisa Mihajlovic dinhmun a him thu a sawi a, "Inter nena kan inkhel result hian Mihajlovic dinhmun pawh a hril thui hle a, tunah chuan a him e," a ti.

Nikum November thla hnuah Milan hian league match vawi 11 an khelh aṭangin vawi li chiah hnehna an chang thei a, an manager dinhmun pawh a him lo hman hle a ni.

Milan manager Mihajlovic chuan, "Inter leh Fiorentina kan hneh a, Roma nen kan inhenhtawk bawk. Tun hnaia kan result hi chu a ṭha hle a, kan chhawmnun zel pawh ka duh," a ti.

Dan theih loh Juve

Champion lai Juventus chuan khualmualah Chievo chu 4-0 in an sawp a, hmahruaitu Napoli nen an inthlauhna chu point hnih a la ni zel.

Juve-in a zawna league match 12-ah hnehna an chan zan hian Real Madrid forward hlui Alvaro Morato chuan goal hnih a khung bakah defender Alex Sandro leh midfielder Paul Pogba te chuan goal an khung bawk.

Massimiliano Allegri a naute hian season tira an league match hmasa pariatah vawi hnih chiah hnehna chang thei mah se an insiam ṭha leh tawh a, a zawna vawi nga league title la tura beiseiawm ber an ni leh tawh.

Hmahruaitu Napoli

Point 50 hmua Serie A hmahruaitu Napoli-in an khelmualah an mikhual Empoli midfielder Leandro Paredes an veng hneh lo a, minute 28-naah goal an chhuah.

Mahse, champion tum Napoli hian Gonzalo Higuain, Lorenzo Insigne leh Michele Camporese te goal khat ṭheuh bakah Jose Callejon goal hnih khung hmangin an chhang let a, 5-1 in hnehna an chang.

Argentina forward Higuain hian tun season-ah a club tan league match 22 a khelh tawh aṭangin goal 22 a khung tling tawh. Higuain hi khel ṭha tluang rih viau mah se second half-ah a hnungzâng na vangin thlak a ni.