Vawiin atangin MPL5 Qualifier Project Veng Vs Chhinga Veng; Champhai Vs Ramhlun North
Mizoram Premier League Season 5 khel tur zawnna qualifier chu vawiin aṭangin Lammualah khelh ṭan a ni dawn. Aizawl DFA champion Chhinga Veng FC-in vawiin chhun dar 12:00-ah Kolasib aiawh Project Veng FC an hmachhawn dawn a,tlai dar 2:00-ah Champhai United leh Ramhlun North te an inkhel ang.
Inelna kalphung
MPL5 Qualifier khel club palite hi vawi khat ṭheuh an inkhel kual ang a, MPL khel turin point hmu sang ber an tling ang. Club pahnih emaw a aia tam emaw point hmuh zat a inang a nih chuan head to head en tur a ni.
Qualifier-a pahnihna hian MPL4-a pasarihna Luangmual FC nen double legged playoff an khel dawn a, MPL Playoff vawi thum khelh tawhah qualifier-a pahnihnain MPL pasarihna an la hneh ngai lo.
Chhinga Veng Vs Project Veng
Chhinga Veng hi Lammual boruaka zam tur an ni lo a, inelna neihna tur Lammual hi ADFA First Division League khelhna hmun an nih bawk avangin Aizawl DFA champion hi Kolasib club Project Veng aiin an dihmun a ṭha zawk.
Chhinga Veng manager Lalthanzama Vanchhawng chuan, "Project Veng FC hming hi kan vawi khat hriatna a ni a, kan hriat theih chin chu an khaw chheh vela player ṭha ṭha an inla khawm tih zawng a ni. Game a nia, vanduai theih chu ni mah se kan huphurh lo a, kan chak ngei kan ring," tiin team ṭha zawka a inngaih thu a sawi.
Zama chuan sawi chhun-zawmin, "Chhun dar 12:00-ah vawi hnih kan khel dawn a, kan fixture hi a fuh lo hle. Amaherawhchu kan coach chungah rinna kan nghat a, vengchhung mipui ṭawiawmna ṭha nen result ṭha kan nei ang," tiin Vanglaini palai a hrilh.
Chhinga Veng tan Aizawl FC Academy nen ADFA League final an khelh ṭuma goal hnih khungtu Lalthlamuana (Thlatea) bakah captain C. Lalbiaksanga (Armed Veng South) leh mid-fielder Vanlalhriata (Vaivakawn) te an pawimawh ang.
Project Veng coach Joseph Zoremsanga chuan, "MPL tlin ngei tumin player kan la khawm a, MPL hi Kolasib ban phakah a awmin kan hria. Kan inkhelh huna kan mamawh chu Kolasib khaw chhuak Aizawla awmte
ṭawiawmna a ni," tiin a sawi.
Kolasib hian an khua aṭanga MPL khel tawh Lalthanzama Fanai, Ricky Zonunmawia leh Lalrintluanga (Tuka) an rawn hruai a, Serchhip aṭangin Chanmari FC winger hlui C. Lalnuntluanga leh FC Kulikawn winger hlui Lalremruata (Arapa) te an la bawk.
Champhai Vs Ramhlun North
Inkhelh pahnihnaa inhma-chhawn tur Champhai United leh Ramhlun North hi coach inbeihna turah a ngaih theih.
Champhai boss NL Thanga hi kum 64-a upa a ni tawh a, kum 1982 khan NIS Diploma Course zoin kum 1988 khan Imphal-ah Mizoram chu North East Sports Festival-ah a champion pui. Veteran coach hian a hun laiin Mizoram Police a lo champion pui tawh ṭhin a, player tam tak a chher chhuak a, upat lamah pawh a la intuai thar peih reng bawk. NL Thanga hian kum 2011-a British coach Hugh Lewis hnuaia training-te, kum 2012-a German coach pahnih Felix Imm leh Lutz Pfannenstiel te training bakah FIFA Grassroots Trainers Training hmasa ber (2012) te kha a chhim kim vek.
Champhai United coach NL Thanga chuan, "Chak tumin Aizawl kan rawn pan a, MPL khel turin kan tlin theih kan ring," tiin Vanglaini palai a hrilh a, Lammual lamah Champhai khawchhuak ṭawi-awmna a ngen tel bawk.
Ramhlun North coach Lalruatliana Sailo (Tawia) hian NIS Diploma Course a zawh hnuin AFC B Certificate Course bakah D-Certificate Instructors Course a zo tawh bawk. Coach hmabak êng tak Tawia hian MPL1 Qualifier-ah FC RS Annexe a tlinpui a, FC Kulikawn-ah player angin a inlan tawh bawk.
Ramhlun North boss Tawia chuan, "Champhai hi eng ang chiaha ṭha nge an nih tih ka hre lo a, tuna kan tih theih chu fimkhur taka khelh a ni. Ka player-te hi hming langsar bik chu an awm lo a, amaehrawhchu MPL1-a FC RS Annexe player-te ai kha chuan an ṭha zawk," tiin MPL khel tura an ṭhat tawk thu a sawi.
MPL Thlirna Tawi
MPL1
Qualifier : Aizawl FC, Reitlang FC,
Chanmari FC,
FC RS Annexe
Champion : Dinthar FC
Relegate : FC RS Annexe
MPL2
Playoff : Luangmual FC
Qualifier : Chanmari West FC
Champion : Chanmari FC
Relegate : FC Kulikawn
MPL3
Playoff : Chanmari West FC
Qualifier : Lunglei FC
Champion : Aizawl FC
Relegate : Lunglei FC
MPL4
Playoff : Reitlang FC
Qualifier : Luangmual FC
Champion : Aizawl FC
Relegate : Mizoram Police FC
Note : MPL Playoff-ah qualifier-a pahnihnain
MPL pasarihna an la hneh ngai lo
Fixtures
Lammual
February 2, Thawhlehni
12:00 Noon Project Veng FC, Kolasib Vs Chhinga Veng FC
02:00 PM Champhai United Vs Ramhlun North FC
February 5, Zirtawpni
12:00 Noon Chhinga Veng FC Vs Champhai United
02:00 PM Ramhlun North FC Vs Project Veng FC, Kolasib
Rajiv Gandhi Stadium, Mualpui
February 9, Thawhlehni
12:00 Noon Champhai United Vs Project Veng FC, Kolasib
02:00 PM Chhinga Veng FC Vs Ramhlun North FC