Bagan hmaah Shandong Luneng

Mohun Bagan chuan vawiin chawhnu dar 12:30 hian AFC Champions League Second qualifying round-ah Chinese Super League pathumna Shandong Luneng Taishan FC an hmachhawn dawn.

I League champion Bagan hian Singapore club Tampines Rovers an hneh ṭuma goal khung-tu Cornell Glen chu visa fel loh vangin an hruai tel thei lo a, Mizo tlangval Jeje Lalpekhlua'n mawhphurhna a ngah sawt ang.

Shandong Luneng Taishan hi an mual Jinan Olympic Sports Center Stadium-a khel tur an nih avangin an dinhmun a ṭha zawk a, player an neih ṭhat zawk vangin chak tura ngaih an ni bawk. Chinese club hi Brazil leh club ṭha tak tak Corinthians, Grêmio, Cruzeiro leh Fla-mengo te lo enkawl tawhtu Mano Menezes enkawna hnuaia khel an ni a, Brazil international forward Diego Tardelli leh Argentina tana inlan tawh Walter Montillo te an kawl bawk avangin hming en mai chuan chak tur zawk an ni.

Mohun Bagan striker Jeje chuan, "Vawi khat chiah practice-na hun kan nei a, vur te a tla bawk nen khelh a har dawn khawp mai," tiin Vanglaini palai a hrilh.