Mizoram-in SAI hnehin final an lut
Mizoram tan 50th Junior National Football Championship for BC Roy Trophy final kalkawng a awlsam lo a, nimin khan S.Kartar Singh Bains Memorial Football Stadium, Kheramahilpur-ah Sports Authority of India chu 2-1 in an hneh hram.
Champion lai Mizoramin nomawi humhim turin February 3, Nilaini hian final-ah Punjab an hmachhawn ang. Punjab hian final thleng turin semifinal-ah Assam 1-0 in an hneh.
Inkhel chu
Mizoram hian semifinal-ah bul an
ṭan fuh lo a, an khingpui SAI-in minute thumna lekah goal an khung. First half tawp hma hretin Salem Veng midfielder R. Lalṭhapuia freekick hmangin Mizoramin an sut a, second half-ah goal a luh belh tawh loh avangin extra time khelh a ni.
Minute 97-naah Sihphir Venghlun winger Zoliansanga'n box pawn dinglam aṭangin a pet kum lut pawp a, SAI keeper tan dan theih a ni lo. Goal khata chungnung Mizoram team enkawltuten chak an duh a, West Bengal lama goal khungtu striker K. Roluahpuia aiah defensive midfielder Lalhriatpuia an luhtir a, hun tawp hamrik thlengin goal an chhuah tawh lo.
Inhliam buaina
Mizoram hian final-ah hrem vangin captain David Laltlansanga an chhawr thei dawn lo, inhliam vangin midfielder pathum Lalbiakfela (ngalrek), Khiangdingpuia (ṭhal) leh Lalramngheta (ṭhal) te an hman theih loh hmel bawk. Hei chauh hi a la ni lo, goalkeeper Lalruatfela leh Malsawmtluanga ten khawihli an nei ve ve a, anni pawh hian Punjab an hmachhawn theih a rinawm loh.
Coach thukhawchang
Mizoram manager Lalchhuanawma Pautu chuan, "Inpuahchahna hun kan neih tam tawk loh avangin match tir lamah kan buai ziah a, match fitness kan neih loh vang ni berin a lang. Inkhel pumpui thlir erawh chuan chak phu zawk kan ni a, kan chance neih angte khung ilang chuan awlsam zawkin kan chak thei ang," tiin a sawi.
Mizoram coach Lalremtluanga chuan, "SAI hi team ṭha an ni a, kum tluana training nei an nih bawk avangin inkhelh ṭan tirh lamah chuan a manganthlak thei khawp mai. Amaherawhchu kan player-te'n thu an awih a, kan thusawite an ngai chang a, kan thawhhona ṭha hi kan chakna chhan chu a ni. Player inhliam kan ngah avangin final a hautak dawn a, Mizo mipuite Mizoram team tana ṭawngṭai turin kan ngen a ni," tiin Vanglaini palai a hrilh.