Zaninah Premier League inkhel hmuhnawm

Zanin dar 1:15-ah Leicester City-in Liverpool an mikhual dawn a, Reds hi club hming lian zawk ni mah se Foxes hi league hmahruaitu an ni. Champion rinkai Arsenal-in Emirates Sta-dium-ah Manchester United hnehtu Southampton an hmachhawn bawk ang.

Manchester United erawh Louis van Gaal-a hnuaiah Arsenal leh Liverpool te angin football hmuhnawmna lantir lo mah se Dutch manager hmalam hun hriltu a nih theih avangin Old Trafford-a Red Devils leh Stoke City inkhel tur hian ngaihven a hlawh ang.

Leicester an tlo

Ni 43 chhung league hma-hruaitu ni tawh Leicester leh manager huhang ngah Jurgen Klopp a naute inkhel tur hi chak zawk tur rin thiam a harsa. Reds hian King Power Stadium-a league match an khelh hnuhnung vawi ngaah vawi hnih hnehna changin vawi hnih an inhnehtawk a, vawi khat chiah an tlawm.

Tun season-ah erawh Leices-ter hian an khelmual hi an hmang thiam hle. League-ah nikum November thlaa Arsenal an hneh loh hnuah an la tlawm leh lo, zanin pawh hian inrintawkna sang tak nen Reds hi an lo mikhual ang.

Insiamṭhat ngai Gunners

Arsenal-in point 44 hmuin pathumna dinhmun an luah mek a, Liverpool leh Stoke City an inhnehtawk pui hnuah Chelsea an hneh lo a, Manchester City nen an point hmuh zat a intluk tawh.

Arsenal mikhual tur Ronald Koeman a enkawl Southampton hi team lian zinga chhiar tel ni chiah lo mah se an deh a khirh hle. Wenger hian vawi sawm an inhmachhawn tawhah vawi hnih chiah hnehna a chan theih avangin North London club hi chak tura dah ngawt theih an ni bik lo.

Van Gaal Philosophy

Manchester United manager Louis van Gaal-a'n kalphung bik a nei a, amaherawhchu Dutch manager hian English club a enkawl hnuah thutlukna siam fuh tawk loh a ngah.

Van Gaal-a chhuahtir Javier Hernandez-a'n German club tan goal a khung reng a, PSG tan Angel di Maria a khel ṭha a, Dutch manager nena inhmuthiam lo Spanish keeper Victor Valdes-a'n Standard Liege tana a match hmasa berah goal a chhuah lo a, 2-0 in an chak bawk. Barcelona keeper hlui hian mahni chauha thla riat tawp training chu hrehawm a tih thu inkhelh banah a sawi tel hram.

Dutch manager hian duh dan bik a nei a, United-in Van Gaal chungah zahngaihna an lan-tir a, amaherawhchu result
ṭha an neih loh reng chuan kum 64-a upa manager chungah hian dawhtheihna an lantir reng lo ang.