Manchester City coach thar tur Guardiola

Nimin zing khan England, Spain, Italy leh France football-ah January transfer khar a ni a, player lut leh chhuak tam tak kara sawi hlawh ber erawh Spanish manager Pep Guardiola a ni.

Season tawp ruala Bayern Munich chhuahsan tur manager hi Manchester City chuan sea-son thar aṭanga an manager a nih tur thu an puang a, football khawvel a nghawrnghing nghal.

June 30-ah Manchester City manager ni lai Manuel Pel-legrini contract a tawp dawn a, Guardiola hian Chilean mana-ger hi a thlak ang.

Manchester City chuan an thutluknaah an manager Pellegrini chuan a thlawp tlat thu an sawi a, Guardiola nena an inremna chu kum 2012-a an inbiakna aṭanga inṭan daih tawh a nih thu an sawi.

Welcome to Manchester

Pep Guardiola hian Man-ches-ter City-ah kum thum cham turin contract a ziak a, kum khata a hlawh zat tur nia an tarlan hi pound maktaduai 15 a ni.

Khawvela coach fing ber pawl thluak leh Arab sum mawm chawmtu Manchester City thawkdun tur hi khawvelin a nghakhlel a, Premier League club lian dang tan erawh chan-chin lawmawm niin a lang lo.

Mangṭha Pellegrini

Manchester City manager Pellegrini hian kum 2013 khan tun hnaia hausa thar club hi a zawm a, a season hmasa berah Premier League nomawi leh League Cup a chawipui nghal.

Chilean manager hian Pre-mier League match 99 a enkawlah a naute hi vawi 64 hnehna a chanpui a, Jose Mourinho khan Premier League-a a match hmasa 99-ah Chelsea kha vawi 73 hnehna a chanpui a, Pellegrini hian Portuguese manager chiah hi a tluk lo.

Kum 62-a upa manager chuan, "Club nen inbiakna kan nei a, ka contract tawp rualin Etihad Stadium ka chhuahsan dawn. City nen hian kan pahnih remtihnaa contract pawtsei thei turin contract kan nei a, mah se chutiang chuan kan kal dawn ta lo a ni," a ti.

Enga tinge tunah?

Manchester City-in Pelle-gri-ni aia Pep Guardiola an thlang hi a mak lo a, mipui barakhaihtu erawh coach thar tur an puan hun hi a ni. Chilean coach hnuaiah City-in nomawi pali an la chawi thei vek laiin Spanish coach an lakluh thu an tichiang.

Tun season-ah Manchester City hi Premier League-ah Leicester City tluk loin pa-hnih-na an ni a, Champions League-ah last-16 lut tawhin FA Cup fifth round an lut tawh bawk. League Cup-ah phei chuan champion turin vawi khat chak chiah an mamawh tawh a, final-ah Liverpool an hmachhawn dawn.

Real Madrid manager hlui Pellegrini erawhin, "Ka hriat loha hmalakna engmah a awm lo a, thla khat liamtaah khan engkim ka hre tawh a ni. Mahse, thuthang lengvel leh rinthu sawi kha a tam em em a, kha kha a ninawm em avangin vawiina engkim puanzar a ni hi ka lawm a ni. Kar hnih liamta khan ka chhuah hmaa puanzar hi pawi ka tih loh thu club hnenah ka lo sawi tawh," tiin club houtute thutlukna a pawm thu a sawi.

Engvangin nge Pep?

Manchester City-ah Pelle-grini a record a ṭha a, Chilean manager thlak a nih chhan hi mi tam tak zawhna a ni. Mahse he zawhna chhanna tur chuan Pep Guardiola record tluka duhawm a awm chuang lo.

Kum 45-a upa manager hi Barcelona chanchina an manager hlawhtling ber a ni a, Nou Camp-a kum li a cham chhungin champion nomawi 14 a chawi a, heng zingah hian La Liga nomawi pathum leh Champions League nomawi pahnih a tel.

Barcelona a chhuahsan hnuah kum khat tawp a chawl a, kum 2013-ah Bayern Munich a zawm. German club hi season hnih chhung league title a chawipui nghal a, Champions League-ah erawh season hnih chhung semifinal-ah a zawnin a team a tlawm pui.

Tun season Bundesliga-ah point riatin hma an hruai fal mek a, Champions League last 16-ah a club hi luhpuiin Juventus nen an inhmachhawn ang. Spanish manager hian, "Tun season-ah Champions League nomawi kan chawi thei a nih chuan Allianz Arena-a ka hna chu ka zo thei ang," tiin a lo sawi tawh.

Eng nge an sawi?

Man City winger hlui Trevor Sinclair chuan, "City tan chuan thil ropui a ni a, fan-te tan thu lawmawm bik a ni. Khawvela manager ṭha ber pawl a ni a, club zawng zawngin ani hi chu an duh a ni. Player ropui tak tak a lakluh theih turte nena hisap phei chuan hlim taka awm mai loh chu tih theih a awm lo," tiin City-in Guardiola an la lut tur chu a lawm thu a sawi.

Stoke manager Mark Hughes chuan, "Pellegrini-a'n City-ah hna ropui tak a thawk a, an duh ber nomawi a chawi bawk. Pep Guardiola-a te ang manager an awl a nih chuan City-te ang tan chuan an coach neih lai chawlhtir mai hi a ngai ve bawk a ni," a ti.

Liverpool manager Jurgen Klopp chuan, "Khawvela club lian ber pawl pahnihah hna ropui tak a thawk tawh a, Manchester City-ah pawh hna ṭha tak a thawk ang. Khawvela manager ṭha ber pawl a ni tih hi rinhlelh tur a awm lo a, Spain-ah nomawi chawi theih zawng zawng chawiin Germany-ah a chawi nual bawk a, England-ah pawh hian nomawi zawng zawng chawi a tum leh ang," tiin an elpui Manchester City manager thar chu a fak.