ACL-ah Shandong Luneng-in Bagan an sawp

Asia rama club football inelna sang ber AFC Champions League (ACL)-ah Mohun Bagan-in Jeje Lalpekhlua goal khung hmangin Singaporean club ṭha Tampines Rovers chu 3-1 in an hneh a, Indian club zinga ACL-a chak hmasa ber an ni.

Mahse, nimin khan ACL second qualifying round-ah I League champion Bagan hian Shandong Luneng Taishan an hma-chhawn leh a, Hnahthial tlangval Jeje-a'n inkhel bul ṭan mah se Kolkata club-in goal an khung lo a, Chinese Super League pa-thumnain goal ruk ngawt an khung.

Mohun Bagan hian Shillong Lajong aṭanga an lakluh Cornell Glen chu visa fel loh avangin an chhawr thei lo a, ACL Qualifier an khelh dawn avanga AIFF hnena DSK Shivajians nena an inkhel tur sawn an dilna pawmsak an ni lo. Bagan tana harsatna belhchhah turin an inkhelhna hmun Jinan hi ram vawt a ni a, khaw luma inkhel ṭhin Mariners player-te'n insiamrem turin vawi khat chiah practice-na hun an nei.

Luneng Big Stadium-a inkhelah Shandong Luneng tan Walter Montillo leh Diego Tardelli ten first half-ah goal an khung a, second half-ah Yang Xu (55’, 68’), Zheng Zheng (76’) leh Wang Yongpo (88’) ten an khung belh leh bawk.

China club tana goal hma-hruai khungtu Montillo hian Argentina tan vawi ruk a lo khel tawh a, goal hnihna khungtu Tardelli hi 2015 Copa America-ah khan Brazil squad-ah coach Dunga-a'n a ko tel. Second half-a goal khungtute pawh hi an nep chuang lo - Yang Xu, Zheng leh Yongpo te hian China tana an inlan zat belhkhawm hi vawi 66 zet a ni a, an ram tana goal an khung zat belhkhawm pawh goal 30 a ni.

Chinese club Shandong Luneng Taishan hian February 9-ah Australia club Adelaide United an hmachhawn leh ang a, an chak nih chuan ACL group stage an thleng ang.