I League U18 semifinal-ah Aizawl FC

I League Under 18 khelh mekah Aizawl FC chuan nimin khan Lalremsanga leh Isaac Lalruatpuia-te goal hmangin Salgaocar chu 2-0 in an hneh a, semifinal an lut.

Kolkata khawpuia in-khelah hian Aizawl FC penalty hlawhchhuah chu Rochharzela’n a pet goal lo a, captain Stephen Lalnunmawia chu yellow card vawi hnih a chawi avangin hnawhchhuah a ni bawk. Hetichung hian Aizawl FC-in match hmasa chak thei Salgaocar an hneh.

Aizawl FC hian group match an khel zo tawh a, Shil-long club Wahingdoh-in nimin lama Pune an hneh loh avangin semifinal-a Mizoram club hnung zui thei tur hi club pathum an awm. Match khat khelh hmabak nei Salgaocar, Royal Wahingdoh leh Pune FC ten Group B aṭanga semifinal hmunruak pakhat an inchuh ang.

Mizoram coach Nicky Mal-sawmtluanga chuan, "Defender pawimawh Jona-than-a an hrem a, player pawi-mawh inhliam chunga Salgaocar a hneh hi kan lawm takzet. Club president bakah kan club chhungkaw zawng zawng thawhhona ṭhat vanga chak kan ni. Semifinal hi February 7-ah kan khel dawn a, Mizoramah champion nomawi rawn hawn ngei kan tum," tiin Vanglaini palai a hrilh.

Nimina Group A inkhelah AIFF Elite Academy chuan 10-1 in Lonestar Kashmir an sawp a, AIFF Academy tan hian Edmund Lalrindika leh G. Lalengzama ten goal hnih ve ve an khung a, Bethlehem defender Jerry Lalrinzuala'n goal khat a khung ve bawk.

Mizo naupang pakua awmna DSK Shivajians chuan nimin khan Tata Football Academy chu 2-0 in an hneh lo a, I League U18-ah beisei tur an nei tawh lo. DSK hian an player pawimawh captain Jerry Mawihmingthanga leh Lallianzuala Chhangte te chu India Under 23 team-a koh an nih avangin an chhawr thei lo.

Group A aṭangin AIFF Academy leh TFA ten semi-final an lut chiang tawh a, academy ṭha pahnih hian group match hnuhnung berah hmahruaitu nih an inchuh ang.