Thalsik transfer Kum nga chhunga sum sen tam ber ṭum

England-ah January transfer khar a ni a, Premier League club-te sum sen zat chu pound maktaduai 175 niin kum nga hnua January transfer-a sum an sen hnem ber ṭum a ni.

Nipui transfer-ah khan Premier League club-te hian pound maktaduai 870 an lo seng tawh a, January-ah pound maktaduai 175 an sen leh bawk avangin tun season-a transfer bazara an sum hman zat hi pound tluklehdingawn 1.045 a ni.

Kum 2015-16 season hi Premier League club te'n player lakluh nana season khata sum an sen hnem ber ṭum a ni a, kum 2014-15 season-a pound maktaduai 965 an lo sen tawh chu an khum.

Mak takin January trans-fer-a sum chevel tam chhan hi Premier League club liante ni loin club tenau nia ngaihte an ni. Stoke City-in pound maktaduai 18.3-a Giannelli Imbula an lakluhte, Everton-in pound maktaduai 13.5-a Oumar Niasse an lakluhte chu January transfer sum sen tisangtu an ni.

Deloitte finance expert Dan Jones chuan, "Kumin January transfer bazar-a sum sengtu tam zawk hi club tenau tia kan sawi ṭhinte an ni. Season thar aṭangin Premier League club te'n Tv rights aṭangin sum tam zawk an huilut dawn a, hei hi hre ranin club tenaute hian ṭum dang zawng aiin division hniam lama tlak an hlauh avangin sum sen an inhreh lo a ni," a ti.

Watford-in transfer tawpniah Rennes midfielder Abdoulaye Dou-coure leh Udinese striker Adalberto Penaranda-te chu pound maktaduai 16 bawr velin an la lut a, January transfer-ah ringawt pound maktaduai 34 vel seng tawhin Premier League club zingah anni aia in seng hnem an awm lo.

Premier League table mawng lam team paruk ten pound maktaduai 90 vel an seng a, nikuma Premier League team mawngphah parukin January transfer-a sum an sen zat pound maktaduai 20 nen chuan inthlau tak a ni.

January transfer-a sum sen hi tam hle angin lang mah se Premier League club liante erawh an che na lo a, transfer tawp niah phei hi chuan Premier League table chung lam team pariatin player an la lut miah lo.

Premier League club te sum sen pound maktaduai 175 aṭang hian pound maktaduai 110 chu England pawn lam club hnenah a kal a, pound maktaduai 20 chu division hniam lamah niin pound maktaduai 45 erawh Premier League club-te vekin an dawng thung.