Watford khelmualah Chelsea leng lut dawn

Zanin dar 1:15 hian Premier League champion lai Chelsea chu kaithar Watford khelmual Vicarage Road-ah an leng lut dawn a, captain John Terry an thlah bul ṭanna inkhel a ni nghal der tawh ang.

England captain hlui Terry hian kum 17 leh a chanve ngawt a lo chenchilh tawh Stamford Bridge chu tun season tawp ruala a chhuahsan tur thu a lo sawi tawh. Hetiang a nih avang hian Blues inkhel apiang hi an player ropui an thlahna inkhel a ni zel tawh dawn a ni. England international hian a club tan hian match 690 khel tawhin league title vawi li a chawi pui nghe nghe.

Jose Mourionho enkawlna hnuaiah Chelsea hian season bul an ṭan chhe hle a, Portuguese manager hi an ban hial. Ani aiawh tur hian Guus Hiddink an la lut a, an manager lailawk kaihhruaina hnuaiah harhtharna changin inelna hrang hrangah a zawnin match kua an tlawm tawh lo.

Chelsea central defender Gary Cahill chuan, "Season chanve hmasa lam kha chu kan khel chhe lo tih kha phat rual a ni lo, mahse tunah chuan kawng dik kan zawh leh mek tawh. Hnehna kan chan hi chu thu hran ni se, kan inkhelh dan, ball kan in pek kual dan leh rilru puthmang pawh a dik tawh a ni," tiin hmalam an pan zel thu a sawi.

Tun dinhmunah Chelsea hian point 28 hmuin table-ah 13-na an ni mek a, tuna an point hmuh zat ang hmu tur hian season hmasa kha chuan match 11 chiah an mamawh thung. Zanina an hmachhuan tur chu Watford laka result ṭha an neih ṭhin hi a ni thung ang. Club pahnihte inelna hrang hranga an inhmachhawn hnuhnung vawi kuaah Bules hi an tlawm miah lo a, vawi sarih hnehna an chang thei a ni.

Hetihlai hian Watford lam pawhin inrintawkna an nei ve dawn, a chhan chu zanina an mikhual tur ai hian point liin an sang zawk. An intawn hnuhnung ber nikum December 26 (Boxing Day) khan 2-2 in an inhnehtawk bawk.

Watford hian zanin hian Fiorentina aṭanga an lakluh thar Spain international Mario Suarez chu an chhawr theiin a rinawm.

Midfielder Suarez chuan, "Watford leh fan-te hmuh lai ngeia ka theihtawp chhuah ka chak tawh a, he hmuna ka rawn kal a vang hian ka hlimin inkhelh ka chak tawh hle a ni," a ti.

Goodison Park-ah Newcastle

Table mawnglama talbuai mek Newcastle United chuan relegation zone chhuahsan an tum a, sum tam tak sengin Andros Townsend leh Seydou Doumbia an la lut. An player thar pahnih hian zaninah Everton an hmachhawn theih a rinawm.

Newcastle coach Steve Mc-Claren hi thlasik transfer-ah a che na hle a, midfielder pahnih Henri Saivet leh Jonjo Shelvey te a lo la lut tawh bawk.

Team pahnihte hian tun season-ah beisei an phak lo mek a, Everton pawh hian point 29 chiah an la hlawhchhuak. An player pawimawh pahnih Muhamed Besic leh Kevin Mirallas te hliam a dam tawh a, a ṭul a nih chuan zanin hian khelmualah an hmel kan hmu thei tawh dawn a ni.

Roberto Martinez-a naute hian league match hnuhnung pangaah chak ni hmel an hmu tawh lo a, Everton lakah hian an mangchhia aṭanga ṭhan harh an tum ang.