Copa del Rey Barcelona mikhual tur Valencia

3rd February, 2016

Zanin dar 1:30 hian Copa del Rey semifinal first leg-ah Barcelona chuan Nou Camp-ah Valencia an lo mikhual dawn.

Valencia boss Gary Ne-ville-a tan league lama an khelh chhiat khuhmawina hun a ni dawn a, mahse zanina an hmachhawn tur Barcelona hi champion lai an nih avangin a hna hi a awlsam dawn lo.

Manchester United player hlui Neville hian nikum December thlaa Spanish club a enkawl aṭangin La Liga-ah chakni hmel a la hmu lo. Kar tawpa Sporting Gijon laka 1-0 a an tlawm ṭum phei chuan an fan ten an au el hial tawh.

Hetihlai hian Barcelona erawhin result ṭha an nei tluang reng thung. Tun season-ah UEFA Super Cup leh FIFA Club World Cup an chawi tawh bakah La Liga-ah match khata khel tlem chungin point thumin hma an hruai mek.

Nou Camp leh Neville

England international hlui Neville hi player a nih laiin Nou Camp-ah a lo inkhel tawh a, kum 1999 Champions League final-ah Manchester United-in German club lian Bayern Munich 2-1 a an hneh ṭum khan a inlan ve nghe nghe.

Neville chuan, "Nou Camp-ah hian sulhnu ngaihnawm tak ka nei ve tawh a, he hmuna kir leh hi ka nghakhlel hle. Tun ṭumah pawh hian hnuhma ṭha tak ka hnutchhiah leh theih ngei ka beisei," tiin Barca barakhaih theih a inbeisei hle.

Barca innghana Suarez?

Neymar leh Lionel Messi te khel ṭha hle mah se tun season-a Barca tana goal hmaa hlauhawm ber pakhat chu Luis Suarez a la ni.

Liverpool striker hlui hian tun season-ah Catalan club tan hian inelna hrang hrangah goal 31 zet a khung tawh a, Real Madird leh Atletico an hneh ṭumin goal pawimawh a khung nghe nghe. Zaninah pawh hian ani hi a khel a nih chuan Valencia tan ven uluk a ngai lehpek ang.

Copa del Rey semifinal hnu-hnung zawk hi naktuk zanah khelh tur niin Sevilla leh Celta Vigo an inhmachhawn dawn a, kar lehah second leg khelh chhunzawm tur a ni.

Spanish Cup hi kum 1903 aṭang khan khelh tawh niin Barca hi vawi 27 an champion tawh a, record nei ṭha ber an ni. Catalan club hnungah hian vawi 23 champion tawh Athletic Bilbao leh vawi 19 champion tawh Real Madrid an awm bawk.