Nadal hun a la liam lo - Ferrer

World number 6 David Ferrer chuan a hnampui pa Rafael Nadal chuan engtikah emaw chuan Grand Slam title a la lak leh theih a rin thu a sawi.

Kumina Grand Slam hmasa ber Australian Open-ah khan Spanish star Nadal hi first round-ah Fernando Verdasco hneh loin a tla a, season hmasa khan major tournament-ah hlawhtlinna a chang miah lo bawk.

Kum 33-a upa Ferrer chuan “King of Clay” tia hming lem an vuah Nadal chungchang sawiin,"Rafa hi tunah khawvela a ṭha zual 10 zingah a la tel theih avangin dah hniam ngawt a la thiang lo. Clay tournament kan khel ṭan leh tawh dawn a, tu tan pawh hneh a harsat leh dawn avangin champion nomawi a la chawi leh ngei ka ring," a ti.

Grand Slam title 14 la tawh Nadal hi clay-ah chuan hneh theih loh ang hiala ngaih ṭhin a ni a, French Open-ah pawh vawi kua ngawt a champion tawh a ni.