MPL5 Qualifier-ah Aizawl khaw club chak
Mizoram Premier League Season 5 khel tur zawnna qualifier chu nimin khan Lammualah khelh ṭan a ni a, Aizawl DFA aiawh Chhinga Veng FC leh Ramhlun North FC te an chak.
Inkhelh hmasa zawkah Kolasib club Project Veng FC lakah Aizawl district champion Chhinga Veng an vannei hram a, minute 81-naa Vanlalhriata goal hmangin 2-1 in an chak. Match hnuhnung zawkah Ramhlun North-in Jerry Lalrinzuala leh David Lalrinchhana hmangin 2-0 in hma an hruai a, injury time-a Champhai United tana Zonunsanga goal-in inkhel result a ti danglam lo, Haier First Divi-sion League-a pathumna Ram-hlun North 2-1 bawkin an chak.
Freekick leh penalty
Chhinga Veng-in inkhel bul an ṭan ṭha a, minute 12-na leka Vanlalhriata freekick hmangin hma an hruai nghal. Aizawl club-in first half an thunun zawk a, Kolasib club Project Veng an che thei lo.
Second half-ah player nei
ṭha Project Veng an insiamṭha a, minute 58-naah Chanmari FC player hlui C. Lalnuntluanga'n freekick hmangin an siphurh an sut. Kolasib lam phur chho viau mah se Lalthanzama Fanai handball vangin minute 81-naah penalty an chawi a, Chhinga Veng tan Vanlalhriata'n goal-ah chantirin Aizawl DFA cham-pion an chak hram.
Chhinga Veng manager Lal-thanzama Vanchhawng, "Kan khel ṭha lo a, chutichung chuan khelh chhiat nia point thum kan hlawh thei hi kan lawm. Discipline ken kawh duh vangin player kan hrem a, hei kan club kal zelna tura atana pawimawh a ni," tiin an kim loh thu a sawi lang.
Project Veng coach Joseph Zoremsanga chuan, "Penalty an hmuh hma khan kan keeper chungah khan an foul tawhah kan ngai a, hriatthiam har kan ti hle. Match hmasa ber a nih avangin khelh a harsa a, Ramhlun North kan hmachhawn hunah chuan a dang tawh ang," tiin Vanglaini palai a hrilh.
Ramhlun N an vannei
Inkhel hnuhnung zawkah Lammuala inkhel ngun zawk Ramhlun North bawkin bul an ṭan ṭha a, Jerry Lalrinzuala goal hmangin minute 8-na lekah hma an hruai nghal. Amaherawhchu mikhual Champhai United goal khat chhuah vangin an buai lo a, an pumraw lenna leh an chakna hmang ṭangkaiin Ramhlun North tlarhnung an chhaih buai ngun hle.
Amaherawhchu Champhai United-in an goal khung theih loh an tuar a, minute 53-naah an midfielder pawimawh Lalchuanpuia chu hnawhchhuah a ni a, hemi rual tho hian Ramhlun North player Lalrohlua Sailo-in red card a hmu bawk.
Player 10 ve vea an khelh hnuah Ramhlun North-in goal an khung hmasa a, David Lalrinchhana'n minute 83-naah goal hnihna a khung. Injury time-ah Champhai in penalty an hmu a, Zonunsanga'n khung mah se result a danglam phah lo.
Ramhlun North coach Lalruatliana Sailo (Tawia) chuan, "Turf-ah an practice nasa tih a hriat a, keini aiin artificial turf an hmang thiam zawk. Player ṭha tak an ni a, chutihrualin chak phu zawk kan ni. Tin, league match a nih avangin an penalty hmuh dan hriatthiam har ka ti a, pawi ka ti bawk," tiin a sawi.
Champhai United coach NL Thanga chuan, "Kan vawi khat khelhna a ni a, kan duh angin kan la khel thei lo. Kan khel ṭha tawk lo a, insiamṭhat vat kan mamawh a ni," tiin a sawi.