National Junior Championship Final Tlai dar 1:30-ah Mizoram Vs Punjab
50th Junior National Football for BC Roy Trophy hi football hmanga India ram state hrang hrang junior team-te inelna a ni a, a hlutna zawnga teh chuan football hmanga state inelna bikah Santosh Trophy chiah a tluk lo.
Vawiin tlai dar 1:30 hian S.Kartar Singh Bains Memorial Football Stadium, Kheramahilpur-ah ram pum huap inelna final hi Mizoram leh Punjab ten an khel dawn. Champion lai Mizoram tan champion zawn bakah inelna vawi 50-naa nomawi chawitu nih chu duhthusam a ni.
Punjab an lian
Inelna thlengtu Punjab hi National Games final-ah Mizo-ramin an hneh a, amah-erawhchu he state vek hian anmahni mualah Mizoram chu 2015 Santosh Trophy semifinal-ah an hneh.
Punjab hi Tamilnadu (6-1), Uttar Pradesh (0-0) leh Jharkhand (1-1) te nen group khatah an awm a, chak loh nei loin semifinal an lut. Final lut turin Punjab hian Assam chu 1-0 in an hneh a, chak zawk tura rinkai an ni.
Mizoram coach Lalrem-tluanga chuan an khingpui tur Punjab chu pumraw lama an len ṭhat thu a sawi a, manager Lalchhuanmawia Pautu chuan an khelhpui tawhte aia ṭha a tih thu a sawi ve bawk.
Mizoram an buai
Mizoram goalkeeper Lal-ruat-fela leh Malsawmtluanga ten khawihli an neih ve ve avangin semifinal-a Sports of Authority lama chakna goal khungtu winger Zoliansanga a keeper dawn. Mizoram tana thu lawmawm erawh tlarhnung pali hman ṭhan centre back pahnih Lawmsangzuala leh PC Lalremruata bakah right back Joseph Lalsanglura leh left back Stephen Lianzalala ten Punjab an hmachhawn thei dawn.
Mizoram coach Remtluanga chuan, "Final-ah hian kan fim-khur a ngai a, kan kim loh bawk avangin defensive-in kan khel nghal ang. Defensive midfield pahnih ka dah dawn a, counter attack hmangin kan nawr let ang. Kan dihmun a ṭha lo tih kan hria a, champion ngei erawh kan tum," tiin Vanglaini palai a hrilh.
Dam kim ve ve a khelh tur chu ni se Mizoram dinhmun a chhe bik lo, amaherawhchu Mizoramin captain David Lal-tlansanga hrem vangin an chhawr thei dawn lo. Chawnpui midfielder David-a bakah hian midfielder dang pahnih Lalbiakfela leh Khiangdingpuia te an khel thei lo chiang a, Luangmual mid-fielder Lalramngheta erawh ṭhal hliam vangin buai tho mah se mamawhna a san dan a zirin substitute aṭanga dah luh theih a ni thung.
Defensive midfield-a Mizo-ram tana bul ṭan tur Saidan Academy naupang Lalnunhlua hi a vawi khat inlanna tur a ni a, a kawppui tur Lalhriatpuia hi semifinal extra time-a lut a ni. Attacking midfield-ah SAI lama goal hmahruai khungtu winger R. Lalṭhapuia a awm dawn a, West Bengal lama goal khungtu striker K. Roluahpuia chu right wing-ah hman a ni dawn a, left wing-ah Alan Lalruatfela a awm bawk ang. Striker mal tlat tur chu Chite Veng rawlthar Lalbiaknia a ni.
Beiseina
Mizoram manager Lal-chhuan-mawia Pautu chuan, "Tun inelnaa referee thutlukna hi hriatthiam a har ṭhin a, final-ah pawh a danglam lo ang. Punjab hian home advantage an nei ngei dawn a, amaherawhchu champion tumin theihtawp kan chhuah ang," tiin Vanglaini palai a hrilh.
Mizoram coach Remtluanga chuan, "Inelna ṭantirh aṭangin Pathianin min awmpuiin ka hria a, final kan thlen theihna chhan hi Amah vang liau liau a ni a, Punjab kan hmachhawn hunah pawh min thlah thlam lo ang. Mizo mipui ṭawngṭaipuina kan ngen a, Mizoram team-in khelmualah theihtawp kan lo chhuah thung ang," tiin inhliam vanga harsatna karah champion ngei a inbeisei thu a sawi.