Teixeira lakluh loh vanga inchhir lo Klopp

Liverpool manager Jurgen Klopp chuan hun rei tak sawizawm an nih hnua Shakhtar Donetsk midfielder Alex Teixeira an la lut lo chu pawi a tih loh thu sawiin fan-te chu club thutluknaa rinna nghat tlat turin a sawm.

Reds hian tun season league match 15-a goal 22 khungtu midfielder hi pound maktaduai 27-a lakluh tumin an dawr a, Shakhtar lamin pound maktaduai 38 an phut thung. Merseyside club hian pound maktaduai 38-a an ngam hnuah Ukrainian club hian pound maktaduai 50 an phut leh avangin Liverpool hian an lei duh ta lo a ni.

German manager Klopp chuan, "Fan-te hian min ringtawk tur a ni. Teixeira hi lakluh tumin kan dawr ngei a, mahse kan indawrna kha a kaltluang lo em em a ni. January a nih avangin Shakhtar-in sum an phut hnem a, an phalna zata kan lei loh chuan hralh loh an pawi ti lo. Pawisa kan nei lo a ni lo a, mahse zahawm leh awmze nei takin sum kan hmang tur a ni. January bazar-ah player la lut lo mah ila hma kan la em em ang," tiin Liverpool fan-te chu dawhthei turin a chah.

Borussia Dortmund manager hlui chuan player a neih ṭhat tawk thu sawiin, "Ka striker-te an in fit vek a nih chuan duhthlan tur pali ka nei a, Roberto Firmino a la awm cheu bawk," a ti.

Liverpool hian striker pali Danny Ings, Daniel Sturridge, Christian Benteke leh Divock Origi-te an nei a, an striker zinga inhliam lo awmchhun erawh Benteke chiah a ni.

Klopp chuan, "Kan tlarhma min pui thei tur player lakluh hi pawi ka ti hran lo a, mahse player ka la lut dawn a nih chuan an phu tawk pawisain kan lei tur a ni a, uchuak taka sum hman ka tum lo. Kan dinhmun hi a duhawm lo tih ka pawm a, mahse hei hian kan player naupang zawkte tan hun ṭha a hawng dawn a ni," tiin a player naupang zawkte a chhawr tur thu a sawi.