Van Gaal-a hnuaiah United an par?
Manchester City-in Pep Guardiola an chan hnuah Manchester United ṭantuten Louis van Gaal kaihhruaina hnuaiah lawmna tur an hmu a, Old Trafford-ah Red Devils-in 3-0 lawihin Stoke City an sawp.
United-in attacking football hmuhnawm tak an khel a, mualneitu tan hian Jesse Lingard, Antony Martial leh Wayne Rooney ten goal an khung.
Martial a sial
Manchester United-in result ṭha an hlawh chhuah zan hian Stoke City aiin ball possession an nei tlem zawk a, hei hi tun hnaia United khelh dan en chuan a mak ang reng hle. United tan hian pound maktaduai 36.5 man Anthony Martial a che ṭha a, captain Wayne Rooney-a'n team tan a thawh hlawk bawk.
Ṭan aṭanga minute 14-na lekah vei lam aṭanga kum 19-a upa Cameron Borthwick-Jackson cross chu Jesse Lingard-a'n a tauh lut. United hian Old Trafford-a an match hnuhnung 11 first half-a goal an khung loh vangin Lingard a goal hi Van Gaal-a hote tan a hlu hle.
Minute kaw hnuah United-in counter attack an hmang ṭangkai a, Martial-a'n vei lam aṭangin a pet kual lut a, keeper Jack Butland a che lo. Goal luhna tura United player Michael Carrick, Rooney leh Juan Mata te ball inpe kual chu class tak a ni.
Rooney-a'n minute 53-naah Martial-a siam chu hnai tak
aṭangin a khung a, United captain hian Old Trafford-a Premier League inkhela goal 99 a khungna chiah a ni. Stoke-in goal zawnah an pet lo a, chu chuan United goal khelh ṭhat zia a nemnghet a, an daih rei ang em tih erawh zawhna awm thei tak a ni.
Van Gaal a hlim
Manchester United boss Louis van Gaal chuan, "Attacking ang zawnga thlirin first half-a kan khelh dan kha a ṭha hle. Second half-ah erawh inkhel kan thunun a, goal khung theihna tur chance kan siam lo bawk. Stoke laka minute 90 chhunga harsatna kan nei lo kha a chhinchhiah tlak hlein ka hria," tiin a khelh dana a lungawi thu a sawi.
United hian Pathianni zan hian Stamford Bridge-ah Chelsea an hmachhawn ang.
Result dang
West Ham-in Upton Park-ah Michail Antonio leh Cheikhou Kouyate te goal hmangin Aston Villa chu 2-0 in an hneh. Hammers hian Premier League match hnuhnung parukah vawi li an chak a, paruknaah an awm chhunzawm zel.
Crystal Palace-in an mual Selhurst Park-ah Scott Dann hmangin hma hruai zet mah se Bournemouth-in Marc Pugh leh Benik Afobe hmangin an chhang let. Cherries hi 2-1 in an chak a, Palace erawh a zawnin vawi nga an chak tawh lo.
Hawthorns-ah Gylfi Sigurdsson hmangin Swansea-in goal an khung hmasa a, injury time-ah Salomon Rondon goal hmangin West Brom-in an sut. Newcastle-in pound maktaduai 21-a lei an tum Saido Berahino chu Baggies-in chhuah an phal loh hnuah bench-ah an ṭhuttir a, darkar khat hnuah lutin goal a khung lo.