Court hmaah Neymar a inlan
Brazilian forward Neymar chu Santos aṭanga Barcelona a zawm dan chungchangah sum chevel dik lo a awm nia ngaiin Spanish Court hmaah Thawhlehni khan a inlan a, Brazil captain hian tihsual engmah an neih loh thu a sawi.
Barcelona hian kum 2013-a Neymar an lei khan euro maktaduai 57 an seng niin an sawi a, euro maktaduai 40 hi a chhungte hnenah lutin euro maktaduai 17 erawh Santos hnenah a lut thung niin an sawi.
Mahse, tun hnaia zirchianna chuan Barcelona hian euro maktaduai 83 an seng niin an sawi thung. Thawhṭanni khan Barcelona president Josep Maria Bartomeu leh a thlak tak Sandro Rosell-te chuan Madrid khawpuia court hmaa an inlannaah tihsual nei lo niin an insawi a, court chuan dik taka ro a rel an beisei thu an sawi bawk.
Neymar-a thubuai chungchanga hmalatu hi DIS anni a, anni hian Neymar-a sports rights 40% an nei a, Neymar transfer a nih khan euro maktaduai 6.8 chiah pek an nih thu leh bum an nih thu an sawi a ni.
Hetihlai hian Brazil lama thuneitute chuan Neymar hi Barcelona-a a insawn hma khan chhiah a awl ru nasa nia sawiin thubuai an siamsak a, Brazil-a a bungraw neih pound maktaduai 33 man hu chu khawih chet theih loha dah mek a ni.