Dynamo Kiev hremna an ti nep

Europe-a football thuneitu sang ber UEFA chuan match hnih chhung an khelmualah entu nei loa khel tura an hrem Dynamo Kiev hremna chu match khatah an tihhniam sak.

Dynamo Kiev hi October thla khan Champions League group stage-ah Chelsea nen an inhmachhawn a, he inkhelah hian an fan ṭhenkhat chu vunrawng inthliarna lam hawi zawngin an che a, hei hi UEFA chuan ngaithiam loin £76,000 (Rs. 7,46,6228.33) an chawitir bakah match hnih chhung an khelmuala entu nei thei lo turin an hrem.

Mahse, Dynamo Kiev hian UEFA hnenah hian an hremna tihnep sak turin an ngen a, UEFA lam chuan Dynamo ngenna hi pawmsakin match khatah a tih tlem sak ta a ni.

Hetiang a nih chuan Ukrainian club hian Champions League last-16 a Manchester City an hmachhawn hunah entu neiin an khel dawn tihna a ni a, December 9-a Maccabi Tel Aviv nen group stage match an khelh ṭumin hremna hmasa chu an lo tuar zo tawh a, entu nei loin Israeli club hi an lo mikhual tawh.