I League Under 18 Salgaocar, Pune leh Wahingdoh?

I League Under 18 group stage chu vawiin hian Kolkata-ah khelh zawh a ni dawn. Group A aṭangin AIFF Elite Academy leh TATA Football Academy te'n semifinal an lut tawh a, Group B-ah Salgaocar, Pune leh Royal Wahingdoh ten Aizawl FC hnung zui turin hmun ruak pakhat an inchuh dawn.

Group A-ah Mizo pakua ngawt awmna DSK Shivajians-in match hnuhnung bera TFA an hneh loh avangin beisei tur an nei tawh lo a, vawiin dar 10:15 hian Howrah Stadium-ah SAI Guwahati an hmachhawn ang. Hemi rual chiah hian TFA leh AIFF Academy ten East Bengal Club Ground-ah group hmahruaitu nih an inchuh dawn. AIFF Academy-ah hian Mizo pali Edmund Lalrindika, Jerry Lalrinzuala, Zonunmawia leh V. Lalengzama te an awm.

Group B-ah Pune FC-in chawhnu dar 2:15-ah beisei nei tawh lo East Bengal an hmachhawn dawn. Pune FC-ah hian Mizo naupang pathum Lalawmpuia, Lalrinawma leh Omega Vanlahruaitluanga te an khel a, qualifier-a player pawimawh Amos Lalnienga erawh chhungkaw harsatna avangin Mizoramah a haw a, final round-ah a inlan thei lo. Pune hian semifinal lut turin East Bengal an hneh bakah Royal Wahingdoh-in Goan club Salgaocar an hneh a ṭul bawk.

Chawhnu dar 2:15-a East Bengal club ground-a Royal Wahingdoh leh Salgaocar inkhel tur hi vawiina inkhel tur pali zingah a pawimawh ber. Salgaocar hian Shillong club laka point an hlawh chhuak hrim hrim a nih chuan semifinal an lut dawn. Wahingdoh tan erawh semifinal lut turin chak ngei ngei a ngai a, Pune-in East Bengal an draw emaw an hneh loh emaw a ngai bawk. Match hnuhnung bera Pune hneh lotu Wahingdoh dinhmun a chhe ber.

Royal Wahingdoh U18 team-ah hian Mizo pali Lalmuan­zuala, Jerry F. Zonunsanga, Lalhmangaihsanga leh V. Lal­rinmawia te an awm a, Salgaocar-ah Mizo an awm lo.