Guardiola chhuangtu a pa Valenti
Khawvela coach hlawhtling ber pawl Pep Guardiola-a'n season thar aṭangin Manchester City a enkawl tur thu tihchian a ni a, Spanish manager chanchin hian football khawvel titi tui ber a ni mek.
Guardiola pa Valenti Guardiola chuan a fapa hian English football-a mipui rilru puthmang a thlak danglam hlawk tur thu a sawi a, Barcelona leh Bayern Munich-a a football pholan
ṭhin ang kha English football-ah a pholan theih a beisei.
Valenti chuan, "Football hi art chi khat angin a thlir a, a duh ber chu chak result hlawh chhuah ringawt a ni lo. Mipui tehmuhnawm tih zawng chhawpchhuak chunga hnehna chan ṭhin hi nuam a tih ber chu a ni," a ti.
Guardiola pa chuan sawi chhunzawmin, "England-a an football khelh dan a en hian tem ve chhin a chak niin ka ngai a, a hlim pawh ka beisei. Hlim dawn lo se duhsak leh zah a hlawhna hmun Germany chhuahsan hi a duh lo ang," tiin a fapain England a pan chhan a sawi.
Spanish manager Guardiola hian Barcelona-a kum li a cham chhungin champion nomawi 14 a chawi hman a, heng zingah hian Champions League nomawi pahnih a tel. Kum khat a chawlh hnuah Bayern panin Bundesliga title pahnih a chawipui leh tawh a, Champions League-ah erawh a la champion pui lo thung.