Mayweather-a'n lo kir a tum lo

Boxing khawvela hming dai tawh ngai lo tur Floyd Mayweather chuan ring chhunga kir leh tura sawmtu tam tak awm mah se inhnek tura kir leh a tum tawh loh thu a sawi.

American boxer chuan, "Dollar tluklehdingawn hial hlawh tura sawm ni mahila, ka chawl tawh a, lo kir ka tum lo. Kir chakna ka neih loh miau chuan sumin awmzia a nei lo," a ti.

Mayweather hian 'Fight of the Century' tia hming­lem an vuahah Manny Pacquiao chu nikum May thla khan a hneh a, khawvela sum tamna ber inhneka a inlan hnuah hian boxing a chawlhsan nghal a ni.

Vawi 49 inhnek a hma­chhawna tlawm miah lo Mayweather hi Pacquiao business adviser Michael Koncz chuan Filipino boxer nen an inhnek nawn leh mai theih thu tun hnaiah a sawi a, Mayweather chuan Koncz -a thusawi hi a pha a ni.

Weight division pangaa champion thei Mayweather chuan, "Michael Koncz-a thusawi hi dawt vek a ni a, Bob Arum-a sawi pawh kha dawt a ni. Miin Mayweather Promotion chungchang an sawi chuan engkim hi ka thuhnuaia awm a ni tih an hre tur a ni," tiin a thu loin a team-te'n engmah an tih theih loh thu a sawi.