Amir Khan leh Saul Alvarez an inhnek dawn

Boxing khawvelin kumin May thlaah inhnek hmuhnawm a hmu dawn - Amir Khan leh Saul Alvarez-te chu WBC world middleweight title inchuh turin May 7 khian Las Vegas-ah an inhnek dawn a ni.

Kum 29-a upa Amir Khan hian nikum May khan Chris Algieri chu New York khawpuiah a hneh a, hemi hnu hian inhnek a hmachhawn leh tawh lo.

Mexican boxer Alavarez hian November thla khan Miguel Cotto chu a hneh a, Amir Khan nena an inchuh tur WBC world middle­weight title hi a hnek chhuak a ni.

Vawi 34 inhnek a hmachhawna vawi 31 chak thei Amir Khan chuan, "Canelo (Saul Alvarez sawina) hian inhnek a thiam em em a, midang angin kei min hmachhawnna hun ṭha a neih hi bawh pelh a duh ve lo. Boxing khawvela hming langsar leh thiam tak tak hmachhawn hi ka duh zel chu a ni a, Saul Alavarez nena kan inhnek tur pawh hi ka phur phah hle a ni," a ti.

Alvarez chuan, "Khawvel middle­weight champion ka nihna ang ngeiin khawvela fighter ṭha ber pawl ka hmachhawn a, ka kawnghren kawl lai kawl chhunzawm zel tur hian ka theihtawp ka chhuah ang," tiin Amir Khan-a tan hna hautak siam a tum thu a sawi.

Vawi 48 inhnek a hmachhawna vawi khat chiah la tlawm Saul Alvarez chuan, "Amir Khan hi boxer ṭha tak, vawi hnih lai world champion ni thei a ni a, a vanglai tak a hmang mek bawk. Kan inhnek en turte chuan inhnek hmuhnawm tak an en dawn a ni," a ti.

Saul Alvarez an inhnek dawn takah chuan Amir khan hian June 4-a IBF welterweight champion Kell Brook nena an inhmachhawn tur chu a ṭhulh phah a ngai ta a ni.