Berahino la lut thei lo McClaren a lawm tho

Newcastle United manager Steve McClaren chuan West Brom striker Saido Berahino la lut thei lo mah se a lawm tho thu a sawi.

Magpies hian English striker hi lakluh tumin January transfer bazar tawp niah West Brom an dawr a, mah se pound maktaduai 21 laia Berahino lakluh an tumna hi Baggies chuan an lo hnar sak a ni.

McClaren chuan, "Bera­hino lakluh kan tumna zat sum aṭang khan he club hian hmasawn a tum tih in hre thei ang. Berahino kha la lut thei ila chu kan ṭhat phah sawt ang tih a chiang a, mah se a tel lo pawhin squad ṭha tak kan nei tawh tho a ni," a ti.

Newcastle hian Ja­nuary transfer-ah pound maktaduai 29 lai an seng a, Swansea aṭangin Jonjo Shelvey, Tottenham
aṭangin Andros Townsend leh Bordeaux aṭangin Henri Saivet-te an la lut a, Roma aṭangin Seydou Doumbia chu loan-in an la lut bawk.

English manager McClaren chuan January transfer bazar-ah an che
ṭha thawkhata a hriat thu sawiin, "Thlasik transfer kan hman danah ka lawm a, player pali ka lakluhte hi player ṭha tak tak vek an ni. Hma kan sawn theihna tur chu keimahniah a innghat tawh a ni," tiin a phur hle.

Newcastle hian tun sea­son-ah player lakluh nan pound maktaduai 83 lai an seng tawh a, an sum sen hi a bul ṭanna mai chauh a la nih thu McClaren chuan a sawi bawk.