Arshavin-a'n club a nei lo

Arsenal winger hlui Andrei Arshavin chu club khelhna tur nei loin a hawi hai mek. Kar tir khan a club khelh mekna Russian club Kuban Krasnodar chuan an chhuah zalen a ni.

Russian international hlui Arshavin hian Zenit Saint Petersburg-ah a football nun bul a ṭan. Euro 2008-ah khan Russia tan a rawn khel ṭha hle a, goal li lai a khung.

Kum 2009 khan Premier League club Arsenal zawmin North London club tan hian match 153 a khel.

Kum 34-a upa Arshavin chuan, "Min sawmtu an awm a nih chuan ka inngaihtuah phawt ang. Sawmna ka dawng a nih hran loh chuan inkhelh ka chawlhsan pawh a ṭul zawk ang," tiin a sawi.

Arshavin hian Zenit tana a khelh laiin Russian Premier League, Russian Premier League Cup, Russian Super Cup, UEFA Cup leh UEFA Super Cup-ah te hlawhtlinna a lo chang tawh a, an ram tan pawh match 75 a khelh aṭangin goal 17 a khung a ni.