Australian Open-in a herliam pui leh her chhuah pui

Tennis season khat chhunga Grand Slam inelna hamsa ber Australian Open chu January 18-31 khan Melbourne Park-ah khelh zawh a ni leh ta a, beisei loh thil tleng a awm nual rualin Novak Djokovic-a'n khawvel tennis a âwp ta em ni? tih chu zawhna lo piang lian ber a ni.

Novak Six-pack

Australian Open-a cham­pion hnem ber chu world number 1 pawh lo ni tawh ṭhin Roy Stanley Emerson a ni a, vawi ruk a champion. He record ropui hi tuma tluk theih tawh loh tur hiala ngaih ni mah se Djokovic-a'n a rawn tluk thei!

Kum 2011 khan Serbian thiampuipa hian kum duhawm a lo hmang tawh a, a zawna match 43 chhung hnehna changin Grand Slam title pathum a chawi. Nikum khan kum duhawm leh zual zawk tawngin match 88 a khelh
aṭanga vawi 82 hnehna changin a chak percentage hi 93% lai a ni.

Kumina Grand Slam hmasa berah Djokovic hian amah khing zotu a tawng lo a, match sarih a khelh aṭangin Roger Federer leh Gilles Simon laka set khat ve ve a hloh bak chu straight set vekin hnehna a chang.

Tournament a zawh meuh chuan Djokovic a hming lem a tan 'Lionel Messi of tennis' tih leh 'Djoker Slam' tih te chu a rawn piang nawlh nawlh mai, a chesual viau a nih loh chuan tennis khawvel a la awp chhunzawm dawn niin a lang.

Beisei phak lo pahnih

Grand Slam vawi 14 cham­pion tawh Rafael Nadal chuan first round-ah a hnampui Fernando Verdasco hneh loin a tla nghal. Spanish thiampuipa hi kum 29 chauha upa la ni mah se season hmasa leh kumin season bul a
ṭan dan ngaihtuah chuan a vanglai hun a liam ve tawh a ang hle.

Tournament khelh dawn khan Simona Halep hi wolrd number 2 a ni a, Serena Williams tih lohah chuan champion tura beisei awm berte zinga mi a ni. Mahse, Romanian star hi a match hmasa berah China nula Zhang hneh loin a tla nghal. Tournament zawha WTA ranking chhuak tharah chuan world number 3-ah a tla thla a ni.

Aussie fachuam a liam

Australian fachuam Lleyton Hewitt-a'n tournament ṭan hmain kumin hi an rama Grand Slam inelna a hmachhawn hnuhnun ber tur a nih thu a sawi a, second round-a David Ferrer a hneh loh kha a match hnuhnung ber a ni hlen dawn ta.

Wimbledon leh US Open champion lo ni tawh Hewitt hian a zawnin kum 20 chhung Australian Open hi a khel a, tennis a khelh hunchhungin title 30 a lak bakah Australia chu 1999 leh 2003 khan Davis Cup-ah a champion pui bawk a ni.

Murray rilru buaina

British mipui atchilh Andy Murray hian an ram mipuiin kum 77 chhung ngawt an lo nghah tawh Wimbledon title chu kum 2013 khan a la a, kum 1936 hnua a vawi khat nan an ram chu nikum khan Davis Cup-ah a champion pui bawk.

Mahse, kumin January thla khan Britain number 1 Andy Murray chuan tournament neih laia a nupui (Kim) chuan fa a nei dawn a nih chuan Grand Slam hmasa berah hian inlan loh mai a tum thu a sawi a, mahse harsatna nei loin final thlengin a khel thei thung.

World number 2 Murray hian final-ah Novak Djokovic a hneh lo a, an inkhelh zawhah a nupui a ngaih pawimawh thu leh an ram lam pana a haw nghal tur thu a sawi. Inkhelh zawha a thu sawi aṭang hian tournament chhung zawng khan a rilru tam tak chu a nupui hnenah a awm tih a ti lang.

Lal thar Kerber

Angelique Kerber chuan Serena Williams hnehin cham­pion nomawi a chawi a, Ger­man nula hian a hnampui hranghlui Steffi Graf record Grand Slam vawi 22 champion tawh Serena-in a rawn nihrual mai tur chu a dan sak a ni.

Kum 28-a upa Kerber hi tournament ṭan dawn kha chuan world number 8 a ni a, kar tira WTA ranking chhuak tharah chuan world number 2-ah a invawrh chho ta dawrh a ni.

Australian Open hi a tirah chuanAustralasian Cham­pionship tih a ni phawt a, chumi hnu kum 1972 aṭang khan Australian Championship tih niin tuna a hming 'Australian Open' hi kum 1969 aṭang khan a pu thung a ni.