Espanyol-ah India U17 captain a trial

India Under 17 captain Deependra Singh Negi chuan kar hmasa khan La Liga club Espanyol-ah trial a nei a, Spanish club dang engemaw zatah an practice session a chhim dawn bawk.

Nikum Subroto Cup champion AIFF team cap­tain Deependra hian kuminah kum 18 a tling ve dawn chauh a, kum a tlin ruala professional contract nei thei turin a bei nasa hle. Indian midfielder duhawm hian khelmual pawn lamah pawh Spanish ṭawng a zir hial a ni.

Deependra-a agent Ravi Daswani chuan, "Negi hian Spanish third division club CE L'Hospitalet leh fourth division club UE Sant Andreu-ah te pawh an practice-naah a khel a, amah thlirtu coach-te'n an duh em em zel a ni," tiin a player chungchang hi a sawi.

Negi hian Spanish club tan a khel a nih chuan Indian player zinga Spain-a khel hmasa pahnihna a ni ang. India U17 captain hma hian defender Avneet Bharti chuan Spanish second division club Real Valladolid Under-16 leh Under-19 tan a lo khel tawh a, Bharti hian nikum khan Polish top division club TS Pod­beskidzie a zawm tawh thung.