Hmahruaitu Champion rinkai UCL? Besei pha lo Leicester Man City Spurs Arsenal

Premier League-ah Liverpool an la champion lo a, chutichung chuan Leicester City nena khaikhin chuan club ropui tak an ni. German coach Jurgen Klopp a kaihhruaina hnuaiah English club ropui Reds hi Leicester hmaah an pul.

Thawhlehni zanah Leicester City-in Liverpool 2-0 in an hneh a, league hmahruaitu an ni. Manchester City-in season thar atana an manager tur an tihchian hnua an match hmasa berah Sunderland 1-0 in an hneh a, Manuel Pellegrini hote hi champion tura rinkai ber an ni. Arsenal erawhin Southampton nen goal awm loa inhnehtawkin beisei an pha lo chhunzawm zel. Gunners hmelma Tottenham Hotspurs-in Norwich City 3-0 in an hneh a, Spurs hian season tharah Champions League an khelh theih a rinawm chho ta.

Vardy Show

Jamie Vardy-a'n Leicester City jersey number 9 a hak chhan Liverpool hmaah chiang taka pholangin English striker hian goal hnih a khung a, King Power Stadium-ah Jurgen Klopp-a enkawl Liverpool an hawi hai hle.

Tun season-ah goal khung theih vangin Vardy-a'n hriat a hlawh a, amaherawhchu Foxes striker hian Premier League-ah box pawn aṭangin a la khung ngai lo. Reds an hmachhawn ṭum hian Riyad Mahrez a long ball chu yard 25 aṭangin Vardy hian a pet kul lut pawp a, goal ropui bik a ni.

Leicester goal khatna hi inkhelh ṭan aṭanga darkar khat­naah chiah a lut a, minute 71-naah Shinji Okazaki ball pet Reds defender dan per chu Vardy bawkin an khung. Foxes in chak an phu a, Mahrez leh Okazaki te goal khung tur Belgian keeper Simon Mignolet-a'n dang lo se chuan goal tam zawk an chhuah ang.

German coach Jurgen Klopp-a'n a player neih dan hre reng chungin January transfer a hmang ṭangkai lo a, Reds hian season tharah Champions League an khelh a rinawm loh. Liverpool boss hian inkhelh banah a player-te khelh dana a lawm loh thu a sawi.

Leicester erawh season ṭantirh­in relegate thei tur zinga ngaih an ni a, tunah erawh champion thei tur zingah an hming lamrik loh a thiang tawh lo. Foxes hi Premier League hmahruaitu an ni a, tun season-ah match 14 chiah khelh tur a awm tawh.

Leicester boss Claudio Ranieri chuan, "Team boruak a ṭha a, tunah chuan City hmachhawn turin ngai kan awh vat a ṭul. Pressure kan nei ve lo a, ṭha takin kan khel zel ang," tiin a sawi.

Leicester leh City te hi Inrinni zan dar 6:15-ah Etihad Stadium-ah an inhmachhawn dawn.

Innghahna tlak Aguero

Stadium of Light-ah Man­ches­ter City tan Argentine striker Sergio Aguero-a'n minute 16-naah inkhela goal awmchhun a khung a, Manuel Pellegrini hoten Sunderland lakah harsa takin point thum an hlawh chhuak.

Black Cats player thar Lamine Kone-a'n a goal khung theihna tur hun ṭha a hlah a, Billy Jones-a'n first half tawp hma hretin goal ban a pet per a, hun tawp dawn hnaiah English right back Jones-a ball pet hi City keeper Joe Hart-a'n a dang leh bawk.

City-in season tharah Pep Guardiola an lakluh thu an puang tawh a, hei vang hian manager
ṭanglai Manuel Pellegrini tan chak result hi a pawimawh lehzual. Inkhelh banah City keeper Joe Hart chuan, "Pellegrini hnungah hian kan ding tlat a, manager a nih vangin kan hmangaih bawk. Player nih chuan fan te, chairman te, manager te leh mahni tan kan khel ṭhin a, tun ṭumah chuan Pellegrini tan kan khel," tiin a sawi.

London club pahnih

Arsenal-in Premier League nomawi an chawi hnuhnung ber
ṭum chu kum 2014 daih tawh kha a ni. Gunners hian club dang angin manager thlak lo mah se Arsene Wenger hote hian club dang chetbuai lai an hmang ṭangkai thei lo a ni ber.

Emirates Stadium-ah Arsenal-in goal an khung thei lo a, Southampton nen an inhnehtawk. Saints hian match li chhung goal an chhuah tawh lo a, Arsenal-in league match hnuhnung paliah chak hmel an hmu ta lo bawk.

Arsenal boss Arsene Wenger chuan, "Theihtawp kan chhuah a, goal chance pawh kan insiam a, goal kan khung thei lo. Ka tlarhmate ka dem lo a, kan khingpui keeper khel ṭhat zan a ni. Kan khelh dan a ṭha a, kan result erawh a lungawi thlak loh," tiin a player-te a dem lo.

French manager thusawi ang chiah hian Saints an vannei a, keeper Fraser Forster-a'n ṭha tak takin a dang a - chung zingah chuan Mesut Ozil goal khung tur vawi hnih a dan a tel.

Arsenal hmelma Tottenham Hotspurs erawhin Carrow Road-ah point thum an hlawh chhuak. Spurs tan hian Dele Alli-a'n minute hnihna lekah goal a khung a, Harry Kane-a'n goal hnih a khung leh bawk.

Spurs leh Arsenal-in point 45 an hmu ve ve a, goal difference
ṭha zawk Mauricio Pochettino hote pathumnaah an awm a, Gunners erawh palinaah an awm thung.