Rosicky hun a tawp?

Arsenal veteran mid­fielder Tomas Rosicky chu a club tan a inlan tawh lo mai thei.

Czech international hi khup na vangin a buai ve reng a, a hliam a dam hnuah tun season-a a vawi khat nan kar hmasa Inrinnia Arsenal-in FA Cup fourth round-a Burnley an hneh ṭum khan a inlan ve. Mahse hemi ṭum hian a malpui a ti na leh a, thla khat chhung vel a chawlh a ngaih a rinawm.

Kum 35-a upa Rosicky hian tun season tawp thleng chuah Gunners-ah hian contract a nei tawh a, North London club-ah hian contract thar a ziak a nih loh chuan inlanna hun a nei tawh meuh lo ang.

Rosicky hian kum 2006 khan Borussia Dortmund aṭangin Arsenal hi a zawm a, manager Arsene Wenger duh zawng tak ni mah se hliam vanga a buai fo avangin a club tan hian vawi 158 chiah inkhel bul a la ṭan a ni.